«Ադրբեջանը համարում է, որ ԼՂ հարցն իր ներքին հարցն է, եւ ինքը դա չպետք է քննարկի որեւէ մեկի հետ։ Դա արդյո՞ք մեր վատ եւ ապաշնորհ քաղաքականության հետեւանքն է։ Կարող է այո, կարող է ոչ, որովհետեւ Սերժ Սարգսյանը 2017թ․ հարցազրույցում ասել է, որ Ադրբեջանը ԼՂ հարցը համարում է իր ներքին հարցը»,-ԱԺ արտահերթ նիստում այսօր ՀՀ կառավարության ծրագրի կատարման 2022թ․-ի ընթացքի մասին զեկույցի քննարկման ժամանակ հայտարարեց վարչապետ Նիկոլ Փաշինյանը՝ անդրադառնալով հարցին, թե ի՞նչ խնդիրներ կան հիմա Ադրբեջանի հետ հարաբերություններում։
Փաշինյանը շարունակեց․ «Ադրբեջանը խոսում է միջանցքների մասին։ Իմիջիայլոց, առիթ չեմ ունեցել ասելու։ Մեր ընդդիմությունը փոխանակ ասի՝ այդ ի՞նչ միջանցք եք ասում, ասում է՝ խոստացել է, որ միջանցք պտի տա, խոստումը չի կատարում, դրա համար այսքան խնդիր կա։ Ես կարող եմ ապացուցել, որ որեւէ բան չեմ խոստացել։ Բայց ասում են, որ խոստացել եմ։ Մյուսն «արեւմտյան Ադրբեջանի» թեզն է, որ ՀՀ տարածքում ադրբեջանցիներ են ապրել։ Է, Նախիջեւանում էլ հայեր են ապրել։ Բաքվում էլ, Սումգայիթում էլ։ Բարդությունները շատ են, բայց հիմնաքարային հարցը փոխադարձ անվստահությունն է։ Ո՞նց այն հաղթահարենք»։
Նիկոլ Փաշինյանը նաեւ հայտարարեց՝ ԼՂ ապագայի թիվ մեկ շահառուն ԼՂ ժողովուրդն է․ «Իրենց հնարավորություն պետք է տրվի խոսել իրենց իրավունքների եւ անվտանգության մասին։ Այդ խոսակցության ընթացքում պետք է որոշվի՝ ո՞ր իրավունքի մասին է խոսքը, անվտանգության ի՞նչ երաշխիքների մասին է խոսքը։ Ցանկություններով չէ, որ պետք է առաջնորդվենք, այլ պետական շահով»։
Լուիզա ՍՈՒՔԻԱՍՅԱՆ
