ԱԺ մարդու իրավունքների պաշտպանության եւ հանրային հարցերի հանձնաժողովի նախագահ Թագուհի Թովմասյանը ՔՊ խմբակցության քարտուղար Արթուր Հովհաննիսյանի հարցով դիմել է ԵԱՀԿ նախագահին՝ ներկայացնելով, թե ապրիլի 4-ին հանձնաժողովի նիստում ինչպես է իրեն պահել նա եւ իր թիմակիցները:
Նամակում մասնավորապես նշված է, որ ՔՊ 15-20 պատգամավորներ, որոնք հանձնաժողովի անդամ էլ չէին, խաթարել են նիստի բնականոն ընթացքը, շարունակաբար սպառնացել ընդդիմության միասնական թեկնածու Էդգար Ղազարյանին ու իրեն, գենդերային բնույթի հայհոյանքներ եւ սեքսիզմի դրսեւորումներ անելով՝ թույլ չեն տվել ՄԻՊ թեկնածուին ներկայացնել իր ծրագիրը:
Թագուհի Թովմասյանն ընդգծել է, որ ՔՊ-ականները խախտել են «ՀՀ ԱԺ պատգամավորների գործունեության եւ երաշխիքների մասին» օրենքի 3-րդ հոդվածով նախատեսված պատգամավորական էթիկայի կանոնները եւ հատկապես խախտել է խմբակցության քարտուղար Արթուր Հովհաննիսյանը, որը ԵԱՀԿ-ի ՀՀ ԱԺ-ի պատվիրակության անդամ է:
Հաշվի առնելով, որ Հայաստանում քաղաքական մեծամասնությունը որեւէ քայլ չի ձեռնարկում՝ պատժելու Արթուր Հովհաննիսյանին՝ Թագուհի Թովմասյանը դիմել է ԵԱՀԿ նախագահին՝ պատժամիջոցներ կիրառելու խնդրանքով ու հորդորել բոլոր հնարավոր միջոցներով, այդ թվում՝ հանդիպումների ժամանակ բարձրացնել Արթուր Հովհաննիսյանին անդամակցությունից զրկելու հարցը:
Կարդացեք նաև
Հռիփսիմե ՋԵԲԵՋՅԱՆ
