Զբաղվածության ռազմավարության ծրագրի նախագծի մշակման համար կատարված հետազոտությունները եւ գործողությունների պլանը քննարկվել է ԱԺ աշխատանքի եւ սոցիալական հարցերի մշտական հանձնաժողովի` ապրիլի 14-ին կազմակերպած աշխատանքային քննարկման ժամանակ:
Նախագիծը մշակվել է ՀՀ աշխատանքի եւ սոցիալական հարցերի նախարարության ներկայացուցիչների եւ մասնագիտական խմբի կողմից:
Հանձնաժողովի նախագահ Հերիքնազ Տիգրանյանը, անդրադառնալով ռազմավարության մշակմանը, ընդգծել է, որ այն մշակելիս հաշվի է առնվել հանրության սոցիալական կառուցվածքը, որն այսօր գոյություն ունի ՀՀ-ում` զբաղված, չզբաղված կամ աշխատանք փնտրող քաղաքացիների եւ գործազրկության մակարդակը:
Հիմնական ռազմավարական նպատակները չորսն են: Ընդհանուր մեկ նպատակը հանգում է նրան, որ զբաղվածության միջոցով մարդիկ հաղթահարեն աղքատությունը եւ վերանա նպաստը` որպես աղքատության հաղթահարման միջոց կիրառելը:
Կարդացեք նաև
Հերիքնազ Տիգրանյանը նշել է, որ զբաղվածության ռազմավարության ծրագրի նախագիծն օրենսդիրի հետ առաջին անգամ է քննարկվում, եւ այն ավելի շատ ճանաչողական բնույթ է կրում: Նա ընդգծել է, որ դեռ գաղափարի նախագծման փուլում եղել են բազմաթիվ քննարկումներ շահագրգիռ գերատեսչությունների հետ, մասնավորապես, ՀՀ էկոնոմիկայի, ԿԳՄՍ նախարարությունների եւ հատվող բոլոր ոլորտների հետ:
«Զբաղվածությունը զուտ աշխատանք եւ վարձատրություն չէ, դա նաեւ տնտեսություն է, կրթություն է»,- ասել է ԱԺ աշխատանքի եւ սոցիալական հարցերի մշտական հանձնաժողովի նախագահը:
ՀՀ աշխատանքի եւ սոցիալական հարցերի նախարարի տեղակալ Ռուբեն Սարգսյանի խոսքով ռազմավարությունը մշակելիս առաջին փուլում իրականացվել է մեծ ուսումնասիրություն առկա աշխատաշուկայի վիճակի խոչընդոտների, ռիսկերի վերաբերյալ, երկրորդ` մշակվել են հիմնական թիրախային խումբը, այդ խմբի հարցերը կարգավորող միջանկյալ ծրագրերը:
Ռուբեն Սարգսյանը տեղեկացրել է, որ այն գաղափարները, որոնց շուրջ բոլոր շահագրգիռ կողմերի համաձայնությունը կա, արդեն իրականացվում են:
Հերիքնազ Տիգրանյանի խոսքով նախագիծը դեռ կարիք ունի որոշ հստակեցումների եւ առաջարկել է ընդլայնված կազմով եւս մեկ աշխատանքային քննարկում ունենալ եւ վիճահարույց կարգավորումների վերաբերյալ լուծումներ գտել:
ԱԺ
