Կոռուպցիայի կանխարգելման հանձնաժողովն ավարտել է ԱԺ «Քաղաքացիական պայմանագիր» խմբակցության պատգամավոր Էդուարդ Աղաջանյանի՝ անհամատեղելիության պահանջների խախտման վերաբերյալ վարույթը։ Հանձնաժողովը պետք է ուսումնասիրեր եւ պարզեր՝ արդյոք Աղաջանյանը «Էքսիփեդ» ՍՊԸ-ի 50% բաժնեմասը տնօրինում է պատգամավորի պաշտոնը զբաղեցնելու հետո։
Հիշեցնենք, որ Սահմանադրության 95-րդ հոդվածով՝ պատգամավորը չի կարող զբաղեցնել իր կարգավիճակով չպայմանավորված պաշտոն պետական կամ տեղական ինքնակառավարման այլ մարմիններում, որեւէ պաշտոն առեւտրային կազմակերպություններում, զբաղվել ձեռնարկատիրական գործունեությամբ, կատարել վճարովի աշխատանք, բացի գիտական, կրթական եւ ստեղծագործական աշխատանքից։
Հանձնաժողովը վարույթի շրջանակներում ձեռք բերված տվյալների եւ Աղաջանյանի ներկայացրած փաստաթղթերի ուսումնասիրությամբ պարզվել է, որ պատգամավորը «Էքսիփեդ» ՍՊԸ-ի 50% բաժնեմասը 2018 թվականի մայիսի 10-ից 3 տարի ժամկետով հանձնել էր հավատարմագրային կառավարման։ 2021-ի մայիսի 10-ին պայմանագրի ժամկետը լրանալու հանգամանքով պայմանավորված՝ 2021-ի մայիսի 7-ին համապատասխան համաձայնագրով, ինչպես նշված է հանձնաժողովի որոշման մեջ, ընկերության բաժնեմասի հավատարմագրային կառավարման 3 տարի ժամկետով երկարաձգելու (2024 թվականի մայիսի 10) մասին։
Ըստ հանձնաժողովի՝ Էդուարդ Աղաջանյանը ԱԺ պատգամավորի պաշտոնը ստանձնել է 2021 թվականի օգոստոսի 2-ին, ընկերությունում 50% բաժենմասնակցությունն արդեն իսկ հանձնված է եղել հավատարմագրային կառավարման պաշտոնը ստանձնելիս։
Կարդացեք նաև
Հանձնաժողովը եզրակացրել է՝ Էդուարդ Աղաջանյանը չի խախտել հանրային պաշտոն զբաղեցնող անձին ներկայացվող անհամատեղելիության պահանջները։
Նելլի ԲԱԲԱՅԱՆ
