Երեկվանից ՀՀ քննչական կոմիտեի մոտ նստացույց հայտարարած 44-օրյա պատերազմում զոհված զինծառայողների ծնողներն այսօր դադարեցրին բողոքի ցույցը։ Այս մասին ՔԿ-ի մոտ լրագրողների հետ զրույցում տեղեկացրեց զոհվածի հայր Արա Ռոստոմյանը։
Հիշեցնենք, որ 44-օրյա պատերազմում զոհված զինծառայողների հարազատները երեկ քննչական կոմիտեի դիմաց նստացույց էին սկսել, փակել էին Մամիկոնյանց փողոցը՝ պահանջելով անհապաղ մեղադրանք առաջադրել 13 ոստիկաններին, որոնք 2022թ. սեպտեմբերի 21-ին Եռաբլուր պանթեոնում քաշքշել էին զոհվածների ծնողներին՝ մարմնական վնասվածքներ պատճառելով նրանց։
Արա Ռոստոմյանը հայտարարեց, որ իրավական առումով իրենց պայքարն ավարտված է, քանի որ Եռաբլուրում զոհվածների ծնողներին քաշքշելու եւ վնասվածքներ պատճառելու համար ոստիկաններին պատասխանատվության ենթարկելու իրավական լուծում չեն տեսնում, հետեւաբար՝ իրենք պայքարը այլեւս կշարունակեն քաղաքական հարթությունում. «Մենք քաղաքական ուժ չենք, ծնողներ ենք, կորցրել ենք մեր ամենաթանկը եւ չենք ուզում նոր զոհեր ունենալ, որ զոհվածների ծնողների բանակը մեծանա։ Եռաբլուրը չենք ուզում որ մեծանա»։
Արա Ռոստոմյանը հայտարարեց նաեւ, որ քաղաքական պայքարը շարունակելու են այնքան, մինչեւ որ հասնեն իշխանափոխության եւ հորդորեց բոլորին՝ միանալ այդ պայքարին։
Մանրամասները քիչ ուշ՝ տեսանյութում։
Կարդացեք նաև
Հավելենք նաեւ, որ ՔԿ-ին մոտ զոհվածների ծնողներին զորակցելու եւ սատարելու էին եկել հասարակական, քաղաքական ուժերի ներկայացուցիչներ։
Նելլի ԳՐԻԳՈՐՅԱՆ
