Հեռուստաեթերում բռնության, ատելության խոսքի քարոզ կա եւ դա շատ վտանգավոր է։ Այս մասին այսօր ԱԺ 8-րդ գումարման 5-րդ նստաշրջանի հերթական նիստում Հեռուստատեսության եւ ռադիոյի հանձնաժողովի 2022թ․-ի գործունեության մասին տարեկան հաղորդման ներկայացման ժամանակ հայտարարեց ՀՌՀ նախագահ Տիգրան Հակոբյանը։ Նա շեշտեց, որ ատելության, թշնամանքի խոսքի սահմանումներ, ցավոք, չկան, եւ դա դժվարացնում է հանձնաժողովի աշխատանքը։
«Օրենքը հստակ ասում է, որ եթե մենք բռնության կոչ ենք տեսնում, որը քրեորեն պատժելի արարք է, ապա պետք է դիմենք պատկան մարմիններին։ Ինքնուրույն որեւէ բան չենք կարող անել։ Վարչական հետեւանքները մենք չենք սահմանում, ի տարբերություն հին օրենքի, որում դա կար։ Ուստի մենք խնդիր ունենք»,-նշեց Տիգրան Հակոբյանը։
Նա շարունակեց․ «Մի գաղտնիք բացեմ՝ առանց անուն տալու։ 20 օր առաջ դիմեցինք դատախազություն՝ հեռուստաընկերություններից մեկով բռնության բացահայտ կոչի համար։ Եվ դա պատահական չէր եղել, որովհետեւ հաջորդ օրը կրկնել էին։ Եվ մեզ պատասխանեցին, որ դրանում հանցակազմ չկա»։
Տիգրան Հակոբյանի խոսքով՝ ստացվում է, որ ՀՌՀ-ն այս պարագայում ավելի կաթոլիկ դուրս եկավ, քան դատախազությունը։
Կարդացեք նաև
Լուիզա ՍՈՒՔԻԱՍՅԱՆ
