ՔՊ նախկին պատգամավոր, ԵԽԽՎ–ում Հայաստանի պատվիրակության նախկին անդամ, ադրբեջանագետ Տաթևիկ Հայրապետյանի տելեգրամյան գրառումը
Երեկ ԱԺ–ում Նիկոլ Փաշինյանի հայտարարություններից մեկը առանձնակի ուշադրության է արժանի:
Նա, անդրադառնալով Տեղ գյուղում տեղի ունեցած մարտերին, ասել, էր իր կարծիքով՝ «Ադրբեջանի պահվածքը եղել է ուխտադրուժ…»: Հետո, իհարկե, սկսում է ասել, որ իր հրամանները չեն կատարվել, բայց դեռ մի կողմ թողնենք այն հարցը, թե դու ինչ ղեկավար ես, որ քո հրամանները ռիսկ են անում չկատարել:
Հետաքրքրական է, թե ինչու ինքը օգտագործեց «ուխտադրուժ» բառը՝ դրանով իսկ խոստովանելով, որ եղել են պայմանավորվածություններ Ադրբեջանի հետ, որոնք Ադրբեջանը չի պահել, այսինքն՝ դրժել է ուխտը:
Իսկ ինչպիսի՞ պայմանավորվածություններ, այնպիսի, որ Ադրբեջանի ԶՈՒ–ն հայտնվի Տեղ գյուղի վարելահողերում մարտի 29-ի լույս 30-ի գիշերը ու սկսի դիրքեր փորել՝ երկարաժամկետ առումով թիրախի տակ առնելով ամբողջ գյուղը: Փաշինյանն էլ ի պատասխան հայտարարեց, որ խուսափում է էսկալացիայից, բան չի կարող անել, թող քարտեզագիրները պարզեն:
Կարդացեք նաև
Արդյունքում՝ Ադրբեջանը խախտեց ուխտը և գնաց էսկալացիայի, որի մեղավորը, իհարկե, «հրաման չկատարածներն են», «մադրիդյան սկզբունքներն են», բոլորն են, բացի Փաշինյանից, որը անհասկանալի պատճառներով գաղտնի պայմանավորվում է, որ աղմուկ չլինի, բայց մեկ էլ Ալիևը աղմուկ է հանում…
Այս մասին մեկ օր առաջ իմ հարցազրույցում նշել էի, որ տրամաբանական բացատրության բացակայությունը թույլ է տալիս ենթադրել, որ եղել են պայմանավորվածություններ, որոնք Ադրբեջանը խախտել է: Ցավոք, դա ճիշտ էր: Արդյունքում մենք ստացանք նոր կորուստներ և՛ տարածքային (Տեղ գյուղի վարելահողերը) և՛ մարդկային:
