Երևանում և մարզերում կստեղծվեն Քրեական ոստիկանության գլխավոր վարչության անմիջական ենթակայությամբ գործող տարածքային ստորաբաժանումներ, որոնց կվերապահվի միայն ծանր և առանձնապես ծանր հանցագործությունների բացահայտման, օպերատիվ կանխարգելման և հետախուզվողների հայտնաբերման նպատակով օպերատիվ-հետախուզական գործունեության իրականացումը:
Պրոֆեսիոնալ և մասնագիտացված ծառայություն ստեղծելու նպատակով մշակվել և e-draft.am կայքում տեղադրվել է «Ոստիկանությունում ծառայության մասին օրենքում լրացումներ ու փոփոխություններ կատարելու մասին» օրենքի նախագիծը։
Նախագծի ընդունման արդյունքում մարզային մակարդակում քրեական ոստիկանության տարածքային ստորաբաժանումների կադրային համալրումը նախագծային լուծումներով կիրականացվի պարեկային ծառայության օրինակով՝ մրցութային տարբերակով, որի շրջանակներում դիմորդները կանցնեն քրեական ոստիկանի որակավորման նախնական կրթական ծրագիր։ Մրցույթին կարող են մասնակցել բարձրագույն կրթություն ունեցող քաղաքացիները և ոստիկանության գործող ծառայողները։
Միաժամանակ, ոստիկանության կառավարման համակարգում օպտիմալ լուծումներ ապահովելու նպատակով Ոստիկանությունում պարեկային ծառայության, քրեական ոստիկանության և հասարակական անվտանգության ապահովման գլխավոր վարչությունների պետերն ի պաշտոնե կհանդիսանան Ոստիկանության պետի տեղակալներ։
Կարդացեք նաև
ՀՀ ներքին գործերի նախարարությունն առաջարկում է ապրիլի 11-ից 26-ը նախագծերի վերաբերյալ դիտողություններն ու առաջարկությունները թողնել e-draft.am կայքում:
Օրենքի նախագիծը հասանելի է հետևյալ հղմամբ:
ՀՀ ոստիկանություն
