Ապրիլի 12-ին Հայաստանում ՄԱԿ-ի Զարգացման ծրագրի (ՄԱԶԾ) կազմակերպած միջոցառման ընթացքում ներկայացվեց աշխատաշուկայի մասնագիտական կազմի պիլոտային ուսումնասիրություն-վերլուծություն, որը նպատակ ունի աջակցելու մասնագիտական կրթության և ուսուցման համակարգին (ՄԿՈՒ): Վերլուծության արդյունքները կնպաստեն ՄԿՈՒ հաստատություններ ամենամյա տեղերի ընդունելությունը պլանավորելիս տեղեկացված որոշումներ կայացնելուն:
Միջոցառումը կազմակերպվել էր ՄԱԶԾ «Հայաստանի մարզաբնակ երիտասարդների զբաղվածության և տնտեսական հնարավորությունների բացահայտում» ծրագրի շրջանակում: 2022 թվականի ապրիլին մեկնարկած ծրագիրը նպատակ ունի աջակցել Հայաստանի մարզերում երիտասարդների կրթական հնարավորությունների բարելավմանը, նրանց ներուժի իրացմանը, կրթությունից աշխատաշուկա անցման դյուրինացմանը և հետագա բարեկեցության ապահովմանը:
Զբաղված աշխատուժի վերարտադրության խնդիրը սահմանում է աշխատաշուկայի վերլուծության հիմնական ուղղությունը, որը կարևոր է ՄԿՈՒ ընդունելությունների պլանավորման և մասնագիտական կրթության իրականացման համար:
«Տարիներ շարունակ ՄԱԿ-ի Զարգացման ծրագիրն աջակցում է մասնագիտական կրթության և զբաղվածության ոլորտներին՝ ապահովելու ուսուցման հնարավորությունների հավասար հասանելիություն և խթանելու երիտասարդների զբաղվածությունը: Մասնագիտական կրթության և ուսուցման ոլորտում մենք ունենք առաջադեմ մարդակենտրոն մոդելներ և քաղաքականություններ:
Կարդացեք նաև
Հուսով ենք, որ ՀՀ կրթության, գիտության, մշակույթի և սպորտի, ինչպես նաև ՀՀ աշխատանքի և սոցիալական հարցերի նախարարությունների հետ համատեղ ստեղծված այս վերլուծական աշխատանքը կաջակցի քաղաքականության և որոշումների կայացման գործընթացներին՝ կրթական ծրագրերն աշխատաշուկայի պահանջարկի հետ ավելի լավ կամրջելու համար»,- ասաց Հայաստանում ՄԱԶԾ մշտական ներկայացուցչի տեղակալ Կոնստանտին Սոկուլսկին։
Միջոցառման մասնակիցներին` պետական մարմինների, շահագրգիռ կազմակերպությունների, փորձագիտական և դոնոր համայնքի ներկայացուցիչներին, ինչպես նաև քաղաքականություն մշակողներին և տեխնիկական մասնագետներին, ներկայացվեց քանակական մեթոդաբանություն, որը հիմնված է աշխատուժի վերլուծության և միջազգային լավագույն փորձի ուսումնասիրության արդյունքում մշակված վիճակագրական գործիքակազմի վրա: Այն հնարավորություն է ընձեռում ՄԿՈՒ հաստատությունների ընդունելության տեղերի պլանավորման վերաբերյալ առաջարկություններ ձևավորել` հիմնվելով տարբեր մասնագիտությունների համար աշխատաշուկայի պահանջարկի վրա:
ՀՀ ԿԳՄՍ նախարարի տեղակալ Արաքսիա Սվաջյանը նշեց, ըստ կրթության ռազմավարության մինչև 2030թ.-ը սահմանված գործողությունների, նախնական և միջին մասնագիտական կրթության ոլորտում նախատեսվում է հստակեցնել բոլոր այն մասնագիտությունների, ինչպես նաև տվյալ մասնագետներին պատրաստող ուսումնական հաստատությունների ցանկը, որոնց կարիքը Հայաստանն ունի:
«Թե՛ մասնագիտությունների հստակեցման, և թե՛ այդ մասնագիտությունների պատրաստման գործընթացն առավել նպատակաուղղված և այդ մասնագետների քանակը պլանավորելու համար մեզ համար շատ կարևոր է աշխատաշուկայի պահանջարկի մասին հստակ տեղեկատվության առկայությունը: Այս մեթոդաբանությունը, որի միջոցով արդեն իսկ ստացվել են որոշակի տվյալներ, կարծում եմ մեզ համար ուղենշային է դառնալու մոտ ապագայում», – ասաց տկն. Սվաջյանը։
Շնորհակալություն հայտնելով ՄԱԿ-ի Զարգացման ծրագրին և պետական գերատեսչություններին, ովքեր ներգրաված են եղել պիլոտային ուսումնասիրություն-վերլուծության և մեթոդաբանության ստեղծման գործում՝ ՀՀ փոխվարչապետի խորհրդական Վիկտորիա Այդինյանը նշեց, որ արագ փոփոխվող աշխարհում մարդկային կապիտալի զարգացումն ու դրան նպաստող համակարգերի ստեղծումն անհրաժեշտություն է:
«Աշխատաշուկայի վերլուծության գործիքի առկայությունը կարևոր է, որովհետև հարափոփոխ աշխարհում աշխատաշուկայի կարգավորման առաջնահերթ գործառույթներից մեկը պետության կողմից տեղեկատվական անհամաչափության խնդիրը կարգավորելն է: Տեղեկատվության ամենակարևոր շահառուն պետությունն է, քանի որ աշխատաշուկայի վերլուծությունն է, որ պիտի դրվի տնտեսական, կրթական և սոցիալական պաշտպանության ոլորտների քաղաքականություններում»,- ասաց Վիկորիա Այդինյանը։
Միջոցառման նպատակն էր զարգացնել պետական մարմինների և այլ շահագրգիռ կողմերի կարողությունները՝ վերանայելու, համապատասխանեցնելու և իրականացնելու կրթության և ուսուցման ազգային քաղաքականությունները և ռազմավարությունները՝ ըստ որակյալ աշխատուժի աշխատաշուկայի պահանջարկի։
ՄԱԿ-ի զարգացման ծրագիր
