«Կարեն Անդրեասյանը չի ընթացք տալիս վարույթներին, այլ՝ բարձրագույն դատական խորհուրդը։ Նրանց ընկերական կապը կամ հարաբերությունները որևէ կապ չունեն վարույթ ընդունելու հետ»,-այս մասին այսօր դատավորների ընդհանուր ժողովից հետո լրագրողների հետ ճեպազրույցում ասաց ԲԴԽ դատավոր անդամ Սերգեյ Չիչոյանն՝ ի պատասխան դիտարկման, որ ԲԴԽ-ն երկու ընկերների ԲԴԽ նախագահ Կարեն Անդրեասյանի եւ արդարադատության նախարար Գրիգոր Մինասյանի կողմից «շահագործվող» կառույց է դարձել։
Հարցին՝ արդյոք արդար է դատավորին պատասխանատվության ենթարկել ժամկետների խախտման համար, այն դեպքում, երբ դատարանները ծանրաբեռնված են, Չիչոյանը պատասխանեց՝ ժամկետների խախտման չափորոշիչներ կան․«Դատավորների մեծ մասը ժամկետներ խախտում է, բայց դրանց չափ կա սահմանված։ Չի կարելի 1,5-2 տարի որոշում չտալ քաղաքացուն»։
ԲԴԽ դատավոր անդամներ Սերգեյ Չիչոյանի եւ Անի Մխիթարյանի պաշտոնավարման ժամկետը լրանում է ապրիլի 9-ին։ Դատավորների ընդհանուր ժողովի այսօրվա օրակարգում բարձրագույն դատական խորհրդի երկու դատավոր անդամի ընտրության հարցն է։ Երեք դատավոր՝ Վերաքննիչ քրեական դատարանի դատավոր Արշակ Վարդանյանը, Ռուբիկ Մխիթարյանը եւ Սնանկության դատարանի դատավոր Արթուր Աթաբեկյանի թեկնածություններն են առաջադրվել։
Նելլի ԲԱԲԱՅԱՆ
