GALLUP International- Հայաստանը ներկայացրել է ռուս-ուկրաինական պատերազմի եւ ներքաղաքական իրադարձությունների վերաբերյալ «Սովորական Պատերազմ» խորագրով հետազոտության արդյունքները։
Արդյոք կարծո՞ւմ եք, որ Ռուսաստանի ռազմական գործողություններն Ուկրաինայում արդարացի են՝ հարցին 2022թ ապրիլ ամսին 27%-ը պատասխանել է՝ լիովին արդարացված են, 18,8%-ը՝ ավելի շուտ արդարացի են, 14,9%-ը կարծում է, որ ավելի շուտ դրանք արդարացի չեն, 24,7%-ի կարծիքով՝ ընդհանրապես արդարացի չեն, 14,7%-ն էլ դժվարացել է պատասխանել:
Հետաքրքիր է, որ նույն հարցին այս տարի տրված պատասխանների պատկերը մի քիչ այլ է: Ի տարբերություն անցյալ տարվա ապրիլ ամսվա, այս տարվա մարտ ամսին միայն 11%-ն է լիովին արդարացի համարել, իսկ 52,4%-ը նշել է, որ ընդհանրապես արդարացի չէ:
Համաձա՞յն եք, որ ռուս-ուկրաինական հակամարտությունն իրականում հակամարտություն է ԱՄՆ-ի եւ Ռուսաստանի միջեւ. այս հարցին ի պատասխան 2023թ մարտ ամսին 66,6 %-ը պատասխանել է՝ համաձայն եմ, 27,1%-ը չի համաձայնել, իսկ 6,3%-ը դժվարացել է պատասխանել:
Կարդացեք նաև
Հետազոտության հարցերից մեկը վերաբերել է միջուկային պատերազմի ներկա ռիսկերին: Այս տարվա մարտին այդ հարցին պատասխանած 25,6%-ի համոզմամբ միջուկային պատերազմի ռիսկը շատ մեծ է, մինչդեռ անցյալ տարի այդպես էր մտածում հարցվածների 17,1%-ը: 15,3%-ի կարծիքով ընդհանրապես միջուկային պատերազմի ռիսկ չկա: Նույն հարցին անցյալ տարի նման պատասխան է տվել 19,5%-ը:
Պատրաստեց Գոհար ՀԱԿՈԲՅԱՆԸ
