«Արտ Սեթ» պրոդյուսերական կենտրոնի կողմից երրորդ անգամ անցկացվող «Արվեստ» մրցույթ-փառատոնը վերջին տարիների միակ միջմարզային միջոցառումն է։ Վերջերս Վեդիի մշակույթի տանը շուրջ մեկ ամիս ընթացող փառատոնի վերջին ակորդն էր՝ մրցանակաբաշխությունը։
«Առավոտի» հետ զրույցում մրցույթ-փառատոնի հիմնադիր տնօրեն Սեդրակ Գրիգորյանը նշեց, որ այս տարի միջոցառման աշխարհագրությունը իսկապես ընդարձակ էր՝ Երեւանից, Լոռու մարզից մինչեւ Սյունիք, մասնակիցների թիվն էլ 130 էր՝ երաժշտական եւ արվեստի դպրոցների սովորողներ, անհատ կատարողներ՝ 6-40 տարեկան։ Շեշտեց նաեւ, որ այս տարի ավելի քան 15 անվանակարգում անցկացված մրցույթ-փառատոնի գերնպատակը միջմարզային մշակութային կյանքի ակտիվացումն է, նոր անունների բացահայտումը։
Մեր զրուցակիցը հատուկ նշեց, որ ժյուրիի աշխատանքներին իրենց մասնակցությունն են բերել ճանաչված երաժիշտներ, այդ թվում՝ օպերային երգիչներ Մագդա Մկրտչյանը, Նունե Բադալյանը, Առնոլդ Քոչարյանը, Երեւանի պետական կոնսերվատորիայի եւ Գյումրիի մասնաճյուղի դասախոսներ՝ կիթառահար Հակոբ Ջաղացպանյանը, քանոնահարներ Մարինե Ասատրյանը, Արմինե Ասատրյանը, ջութակահար Վյաչեսլավ Պետրոսյանը, Երեւանի թատրոնի եւ կինոյի պետական ինստիտուտի դասախոսներ Մարգարիտա Մնացականյանը (ռեժիսոր), Աիդա Արզումանովան (բեմական խոսք), հեղինակ կատարող Դավիթ Ամալյանը, Երեւանի Ռոմանոս Մելիքյանի անվան երաժշտական քոլեջի դասատու, շեփորահար Նիկոլայ Մարտիրոսյանը։
«Ուզում եմ մի ուրախալի փաստ արձանագրել. մրցույթ-փառատոնը հետաքրքրել էր նաեւ մարզերի երիտասարդներին, որոնց այդ մեկ ամսվա ընթացքում հաճախ էինք հանդիպում հանդիսատեսի կարգավիճակում։ Չմոռանամ նշել, որ մրցույթ-փառատոնի շրջանակներում ժյուրիի անդամները սիրով անցկացրին նաեւ վարպետության դասեր»,- հավելեց Սեդրակ Գրիգորյանը։
Հարցին՝ մրցույթ-փառատոնն ավարտվեց, իսկ հետո՞…, մեր զրուցակիցը պատասխանեց. «Միջոցառման դափնեկիրներն ու առավել աչքի ընկած մասնակիցները մեր ուշադրության կենտրոնում են, օրինակ՝ նրանց մասնակցությամբ Երեւանի ռազմական ավիացիոն համալսարանում ապրիլի 16-ին տեղի կունենա համերգ, մայիսին նման միջոցառում կկազմակերպենք Էջմիածնում՝ Ռուբեն Սեւակի թանգարանում եւ այլն… Այսպես մինչեւ հաջորդ տարի անցկացվելիք հերթական մրցույթ-փառատոնը»։
Խնդրեցինք առանձնացնել առավել տպավորիչ ելույթները, որոնք ժյուրիի համար հայտնություն էին։ «Նման ելույթներ եղան, օրինակ՝ Ստեփանավանի արվեստի դպրոցի երգչախմբի կատարումները (խմբավար՝ Գայանե Պեպելյան), Երեւանի Ավետ Տերտերյանի անվան երաժշտական դպրոցից շեփորահար Հակոբ Գրիգորյանի ելույթը (դասատու՝ Հայկ Նազարյան), Վեդիի երաժշտական դպրոցից դուդուկահար Արտավազդ Նազարյանի (դասատու՝ Ալբերտ Սահակյան), Արարատի մարզի Քաղցրաշեն համայնքի երաժշտական դպրոցի շվիահար Սասուն Ալեքսանյանի (դասատու՝ Անդրանիկ Ֆախուրյան), Զովունիի երաժշտական դպրոցի քանոնահար Մարիանա Ալթունյանի (դասատու՝ Նունե Նավասարդյան) կատարումները եւ այլն։ Տպավորված ենք Կապանի արվեստի մանկական դպրոցի սաների նկարչական աշխատանքներով (դասատու՝ Մանե Արզումանյան)…»։
Հետաքրքրությանը՝ մարզային հեռուստաընկերությունները մասնակցություն ունեցա՞ն մրցույթ-փառատոնին, Սեդրակ Գրիգորյանը ցավով արձագանքեց, հավաստիացնելով, թե դիմել են որոշ հեռուստաընկերությունների ու ստացել պատասխան, որ ծառայությունը վճարովի է. «Օրինակ՝ Արտաշատի «Արարատ» հեռուստաալիքից փոխանցեցին, որ իրենք եթե չեն հեռարձակվում, թեեւ մենք դիտում ենք իրենց հեռարձակած ֆիլմերը… Միայն կարող եմ նշել Վեդիի համայնքապետ Գարիկ Սարգսյանի մեծ ուշադրությունը փառատոնին»։
Ռեպլիկին՝ հավանաբար հովանավորներ էլ չունեք, մրցույթ-փառատոնի հիմնադիր տնօրենի պատասխանը հետեւյալն էր. «Նախկինում շատերին ենք դիմել եւ ստացել «ոչ» պատասխանը։ Այս տարի որեւէ մեկին չենք դիմել»։
Սամվել ԴԱՆԻԵԼՅԱՆ
Լուսանկարներ մրցույթ-փառատոնից։
«Առավոտ» օրաթերթ
06.04.2023
