Միացյալ Նահանգների նախկին նախագահ Դոնալդ Թրամփը պատրաստ է դատական պայքարի, ասել է նրա փաստաբանը: Թրամփը պատրաստվում է երեքշաբթի օրը կանգնել դատարանի առջև իրեն առաջադրվող մեղադրանքների վերաբերյալ գործի շրջանակում
Նախկին նախագահ Դոնալդ Թրամփի փաստաբան Ջո Տակոպինան ABC-ի եթերում անդրադարձել է իր պաշտպանյալին առաջադրվող մեղադրանքներին ու առաջիկա դատական նիստին:
«Հուսով եմ՝ հնարավորինս արագ, ներս կմտնենք դահլիճ ու դուրս կգանգ այնտեղից: Դա, ի վերջո, սովորական դատավարություն է, որի ընթացակարգով պետք է կանգնենք դատավորի առջև, ասենք՝ մեղավոր չենք: Մենք ժամանակացույց կսահմանենք միջնորդություններ ներկայացնելու համար և այսպիսով առաջ կշարժվենք»,- ասում է Թրամփի փաստաբանը:
Մեղադրանքները պահպանվում են, սակայն իրավական փորձագետների կարծիքով գործը կարող է կենտրոնանալ պոռնոաստղ Սթորմի Դենիելսի հետ հաշտության համաձայնագրի շուրջ գրավոր փաստաթղթերի ենթադրյալ կեղծման վրա:
Կարդացեք նաև
Տակոպինան կարծում է, որ գործը թերի է և ունի քաղաքական դրդապատճառներ, սակայն չի կիսում նախագահող դատավորի անաչառ չլինելու վերաբերյալ Թրամփի մտահոգությունները:
«Չեմ կարծում եմ, որ գործը վարող դատավորը կողմնակալ է: Ինչպես կարող եմ այդպիսի պնդում անել, եթե չեմ առնչվել դատավորի հետ և որևէ հիմքեր չունեմ հավատալու, որ նա կողմնակալ է»,- ասում է փաստաբանը:
Նախկին նախագահը նաև խիստ քննադատության է ենթարկել մեղադրող դատախազ Էլվին Բրեգին, որը մեղադրական եզրակացություն է ներկայացրել: Դա կարող է հակառակ արդյունքի հանգեցնել, պնդում է Մանհեթենի նախկին շրջանային դատախազ Սայրուս Վենսը NBC-ի «Meet the Press»-ին տված հարցազրույցում:
«Կառավարության գործունեությանը միջամտելը կամ սպառնալիքով կամ այլ կերպ կարող է ստիպել երդվյալ ատենակալներին փոխել իրենց կարծիքը գործի ծանրակշիռ լինելու հանգամանքի մասին»,- պնդում է նա:
Թրամփի փաստաբանները հայտնել են, որ Գաղտնի ծառայությունը երեքշաբթի օրը ներկա կգտնվի դատարանի շենքում և շրջակայքում խստացված անվտանգության ապահովման համար, երբ նախատեսվում է նախկին նախագահի մատնահետքերի հանձնման ու լուսանկարվելու ընթացակարգը նախքան մեղադրանքների առաջադրումը:
Մանրամասները՝ սկզբնաղբյուր կայքում:
