Հասարակական գործիչ Էդգար Ղազարյանը այսօր «Հայելի» ակումբում տեղեկացրեց, որ վաղը ազգային ժողովի մարդու իրավունքների պաշտպանության եւ հանրային հարցերի մշտական հանձնաժողովում քննարկվելու են ՄԻՊ պաշտոնում «Միասին» հասարակական քաղաքական շարժման առաջարկով ԱԺ «Հայաստան» եւ «Պատիվ ունեմ» խմբակցությունների համատեղ առաջադրած՝ իր եւ ՔՊ խմբակցության առաջադրած ՀՀ գլխավոր դատախազի տեղակալ Անահիտ Մանասյանի թեկնածությունները: Նա նաեւ հանրությանը կոչ արեց վաղը ժամը 16։00-ին մասնակցել ԱԺ մուտքի մոտ Արցախի խնդիրներով հրավիրված հանրահավաքին՝ այդպես նաեւ մասնակից դառնալով իրենց իրավունքների պաշտպանության գործընթացին։ «Օրինակ, գան եւ որոշեն՝ իրենց իրավունքների պաշտպանությամբ առաջիկա վեց տարում պետք է զբաղվի քաղաքացիական նախաձեռնությամբ առաջադրված ընդդիմության թեկնածո՞ւն, թե՞ գլխավոր դատախազի ընկերուհիներից մեկը։
Ինձ շատ են ասում, թե ՔՊ-ն շատ է, միեւնույն է՝ քեզ չեն ընտրի։ Ես էլ պատասխանում եմ․ դուք տեսնում եք, ես չեմ տեսնո՞ւմ։ Եվ եթե դուք, որեւէ մեկը հաշտվում է դրա հետ, ես չեմ հաշտվում։ Ես պայքարում եմ։ Ես նամակ եմ գրել ՔՊ խմբակցության ղեկավարին, որ ուզում եմ իրենց հետ հանդիպել։ Այսօր գնացել եմ ԱԺ իրենց խմբակցության գրասենյակ։ Հարցնում եմ՝ նամակ էի գրել ձեզ, ո՞ւր եք, ի՞նչ եք անում։ Վախենում են պատասխանել, փախչում են։ Փախչում են խոսքից։ Ես հո իրենց աչքը, հոնքը չէի՞ կարգավորելու։ Ընդամենը պիտի խոսեմ։ Վախենում են այդ խոսքից»,-ասաց Էդգար Ղազարյանը։
Աշոտ ՀԱԿՈԲՅԱՆ
