««Ոստիկանությունում ծառայության մասին» օրենքում լրացումներ եւ փոփոխություններ կատարելու մասին» եւ ««Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքում լրացումներ եւ փոփոխություն կատարելու մասին» օրենքների նախագծերի ընդունումը պայմանավորված է ոստիկանությունում ծառայության անցնելու գրավչությունն ու շահագրգռվածությունը մեծացնելու, պատշաճ մասնագիտական պատրաստվածություն ապահովելու, ոստիկանության ծառայողների աշխատավարձերը բարձրացնելու եւ կադրերի արտահոսքը կանխելու անհրաժեշտությամբ:
Հարցն առաջին ընթերցմամբ քննարկման ներկայացնելով` ասել է ՀՀ ՆԳ նախարարի տեղակալ Արփինե Սարգսյանն ԱԺ պաշտպանության եւ անվտանգության հարցերի մշտական հանձնաժողովի` ապրիլի 3-ի նիստում:
Առաջարկվում է ներդնել ոստիկանության ծառայողների ատեստավորման համակարգ, որի արդյունքներով համապատասխան ծառայողների համար կհաշվարկվի հավելավճար: Ատեստավորման կարգը, ինչպես նաեւ հավելավճարի չափերը եւ վճարման կարգը կսահմանվեն Կառավարության որոշմամբ:
Ըստ Արփինե Սարգսյանի` նախատեսվում է ունենալ եռափուլ ատեստավորման համակարգ:
Կարդացեք նաև
Ատեստավորման գործընթացը մեկնարկելու է 2023 թվականի մայիս ամսից:
Ծրագրի գործողության առաջին ժամկետը 3 տարի է, որը հաշվարկվում է առաջին խմբի ատեստավորման օրվանից:
Ատեստավորում անցնելու համար դիմելու հնարավորությունից օգտվելու են ոստիկանության բոլոր ծառայողները` անկախ պաշտոնի խմբից: Բացառություն են կազմելու միայն բարձրագույն խմբի պաշտոն զբաղեցնող ոստիկանության ծառայողները, ինչպես նաեւ այն ծառայողները, որոնք տեղափոխվելու են Ներքին գործերի նախարարության տիրույթ:
Ատեստավորման գործընթացի համար պատասխանատու ծառայության կողմից ատեստավորման անցկացման ժամանակացույցները կազմվելու են այն հաշվարկով, որպեսզի նույն փուլով ատեստավորվող, կոնկրետ ստորաբաժանման (ծառայության) ծառայողների թիվը չգերազանցի համալրված ծառայողների մեկ երրորդը` աշխատանքների անընդհատությունն ապահովելու նպատակով:
Պաշտոնի խմբով պայմանավորված` ատեստավորման կարգը եւ պայմանները կարող են լինել տարբերակված:
Ատեստավորման ընթացքում ստուգվելու եւ գնահատվելու են վերոնշված ծառայողների մասնագիտական գիտելիքները, ծառայողական հմտություններն ու մասնագիտական պիտանելիությունը (համակարգչային թեստավորման միջոցով), ինչպես նաեւ ֆիզիկական եւ կրակային պատրաստականության վիճակը (համապատասխան նորմատիվային վարժությունների կատարման միջոցով):
Մասնագիտական գիտելիքների պարզմանն ուղղված հարցաշարը բաղկացած է լինելու ոստիկանության գործունեությունը կանոնակարգող իրավական ակտերով նախատեսված ընդհանուր եւ մասնագիտական հարցերից:
Արփինե Սարգսյանի հավաստմամբ նախագծի նպատակն է համակարգում թողնել այն անձանց, որոնք կարող ուժ են ոստիկանության համար:
Հարակից զեկուցող, հանձնաժողովի նախագահի տեղակալ Արմեն Խաչատրյանը, կարեւորելով օրենսդրական փաթեթի ընդունումը, նշել է, որ դրանով սկսվում է մի գործընթաց, ինչն ուղղված է ոստիկանների գիտելիքների եւ մասնագիտական կարողությունների բարձրացմանը:
Հանձնաժողովականները կողմ են արտահայտվել օրենսդրական փաթեթին, այն ստացել է դրական եզրակացություն:
ԱԺ
