ԱԺ պաշտպանության եւ անվտանգության հարցերի հանձնաժողովի այսօրվա նիստից հետո ՀՀ պաշտպանության փոխնախարար Արման Սարգսյանն իր սովորույթի համաձայն շտապեց հեռանալ՝ լրագրողների հարցերին պատասխանելու փոխարեն անընդհատ հորդորելով հետեւել նախարարության պաշտոնական լրահոսին։ Լրագրողները հակադարձեցին, որ պաշտոնական լրահոսով ստում են հանրությանը, եւ Տեղ գյուղի տարածքում բարելավում իրականում չկա, ինչպես ԱԱԾ-ն է պնդում, եւ Ադրբեջանը մինչեւ 300 մետր զբաղեցրել է Տեղի հողակտորները, հետեւաբար, ի՞նչ բարելավման մասին է խոսքը։
Հիշեցնենք՝ օրերս ՀՀ ԱԱԾ-ն հաստատել է, որ առնվազն հինգ ուղղություններով Ադրբեջանն առաջխաղացում է ունեցել։
«Եթե ձեր ձայնն իմինից բարձր է, դա չի նշանակում, թե դուք ճիշտ եք»,-արձագանքեց Արման Սարգսյանը։ Հարցին՝ ինչո՞ւ բանակը ՀՀ սուվերեն տարածքից հետ չի շպրտում ադրբեջանցիներին, ո՞վ է կապել բանակի ձեռքերը, Արման Սարգսյանը հեգնելով պատասխանեց․ «Չեմ լսում, մի քիչ էլ բարձր ասեք։ Բարձր խոսել չի նշանակում ճշմարտությունն ասել։ Բանակն իր խնդիրը կատարում է։ Միեւնույնն է՝ ասելու եմ, որ հետեւեք պաշտոնական լրահոսին։ Մեր ձեռքերը որեւէ մեկը չի կապել»։
Արման Սարգսյանն այդպես էլ չպատասխանեց, թե ադրբեջանցիների հերթական ներխուժումը ՀՀ ինքնիշխան տարածք ինչու չի կանխվել։ «Ո՞վ է որոշել, որ դուք ավելի հայրենասեր եք, քան ես»,-հարցադրում արեց նա։
Կարդացեք նաև
Լուիզա ՍՈՒՔԻԱՍՅԱՆ
