Թիվ 34 ընտրատարածքային ընտրական հանձնաժողովը կիրակի՝ ապրիլի 2-ին կայացած արտահերթ նիստում ամփոփել է մարտի 26-ին կայացած Սիսիան համայնքի ավագանու ընտրության արդյունքները։
Եվ այսպես, քվեարկության իրավունք ունեցող 22880 ընտրողից մասնակցել է 11 354-ը։ Առաջադրված ուժերից՝ «Քաղաքացու որոշում»-ը ստացել է 1440 քվե, Հայաստանի Հանրապետական կուսակցությունը՝ 2553, իսկ «Քաղաքացիական պայմանագիրը» ՝ 7332 քվե։ 27 քվեաթերթիկ համարվել է անվավեր։
Սիսիանի ավագանու կազմը բաղկացած է 21 անդամից եւ ըստ քվեարկության արդյունքների՝ «Քաղաքացիական պայմանագրին» բաժին ընկավ 13 մանդատ, ՀՀԿ-ին՝ 5, իսկ «Քաղաքացու որոշում»-ը ստացավ 3 մանդատ։
Հիշեցնենք, որ «Քաղաքացիական պայմանագիր» կուսակցության 63 հոգանոց ընտրացուցակը գլխավորում է համայնքի ղեկավարի պաշտոնակատար Արմեն Հակոբջանյանը։
Կարդացեք նաև
«Քաղաքացու որոշում» սոցիալ-դեմոկրատական կուսակցության ընտրացուցակում 30 թեկնածու է, ընտրացուցակի առաջին համարը բանկերից մեկի Սիսիանի մասնաճյուղի կառավարիչ Ավագ Ասատրյանն է, իսկ Հանրապետականի 32 հոգանոց ցուցակը գլխավորում է «Հայաստանի էլեկտրական ցանցեր» ՓԲ ընկերության «Տաթեւ» մասնաճյուղի Սիսիանի ցանցի պետ Ջիվան Մարգարյանը։
Առաջիկա շաբաթ, թիվ 34 ընտրատարածքային ընտրական հանձնաժողով թեկնածուները կարող են ներկայացնել ինքնաբացարկի դիմումներ, որից հետո հանձնաժողովն ավագանու ընտրված անդամներին կբաշխի մանդատները։
Արմեն ԴԱՎԹՅԱՆ
