ՍԱՔՐԱՄԵՆՏՈ, Քալիֆորնիա – Ամերիկայի Հայ Դատի Յանձնախմբի (ANCA) Քալիֆորնիայի տեղական մարմինները ողջունում են Քալիֆորնիայի նահանգային համագումարի(Խորհրդարան) կողմից AJR 1-ի ընդունումը, որը դատապարտում է Ադրբեջանի կողմից Արցախի շրջափակումը:
Ամերիկայի Հայ Դատի Յանձնախմբի մամլոյ հաղորդագրութեան համաձայն՝
Բանաձեւն ընդունուել է երկու կուսակցութիւնների ճնշող աջակցութեամբ, 58 ներկայացուցիչներ միացել են որպէս համահովանաւորներ, իսկ վերջնական ձայների թիւը կազմել է 59 կողմ, 0 դէմ:
«AJR 1-ի ընդունումը հզօր քայլ է Ադրբեջանին արցախահայութեան դէմ իր չդադարող ագրեսիայի համար պատասխանատուութեան ենթարկելու ուղղութեամբ», — նշել է ANCA Ազգային վարչութեան անդամ Այտա Տիմէճեանը: «Մենք երախտապարտ ենք, որ սերտօրէն համագործակցել ենք Համագումարի անդամ Քրիս Հոլդենի եւ նրա գործընկերների հետ՝ ապահովելու այս բանաձեւի ժամանակին ընդունումը, որը կոչ է անում ԱՄՆ կառավարութեանը անյապաղ միջոցներ ձեռնարկել՝ ճնշում գործադրելու Ադրբեջանի վրայ՝ դադարեցնելու Արցախի դաժան եւ անմարդկային շրջափակումը»:
Կարդացեք նաև
ANCA-ի Քալիֆորնիայի մասնաճիւղերը սերտօրէն համագործակցեցին համագումարի անդամ Քրիս Հոլդենի հետ, ով ներկայացրեց բանաձեւը՝ փորձելով վերահաստատել Քալիֆորնիայի կողմից Արցախի ինքնորոշման իրաւունքի ճանաչումը եւ կոչ անել Բայդենի վարչակազմին շտապ մարդասիրական օգնութիւն ցուցաբերել արցախահայութեանը: Բանաձեւը նաեւ կոչ է անում Բայդենի վարչակազմին պատասխանատուութեան ենթարկել Ադրբեջանին իր ագրեսիայի համար՝ կիրառելով Բաքուին տրամադրուող ռազմական օգնութեան 907-րդ յօդուածի սահմանափակումները:
«Այսօր AJR 1-ը վեհաժողովն անցաւ Սենատին՝ երկկուսակցական աջակցութեամբ: Լաչինի միջանցքի շրջափակումը վտանգի տակ է դրել 120,000 հայերի կեանքը, այդ թւում՝ 30,000 երեխաների, ովքեր բախւում են սննդի, դեղորայքի եւ այլ կենսական նշանակութեան ապրանքների խիստ պակասի։ Ես անհամբեր սպասում եմ Սենատի իմ գործընկերների հետ աշխատելուն, որպէսզի այս միջոցն ընդունուի եւ ուղարկուի Կոնգրեսին եւ նախագահին», — ասել է խորհրդարանի անդամ Քրիս Հոլդէնը:
Համագումարի անդամ Քրիս Հոլդենին միացան համագումարի անդամներ Լաուրա Ֆրիդմանը, Վենդի Կարիլեօն, Լիզա Կալդերոնը, Մեգան Դալը, Մայք Գիփսոնը, Մայք Ֆոնգը, Թոմ Լաքին, Քոթի Պետրի-Նորիսը, Էլոիզ Գոմես Ռեյեսը, Լուզ Ռիւասը եւ Բլանկա Ռուբիոն՝ որպէս համահեղինակներ։ Քալիֆորնիայի համագումարի միջոցով դրա յաջող ընդունումից յետոյ բանաձեւն այժմ կքննարկուի Սենատի առջեւ, որտեղ այն կը ներկայացուի Քալիֆորնիաի նահանգի սենատոր Էնթօնի Պորտանտինոյի կողմից, իսկ սենատորներ Բոբ Արչուլետան եւ Սքոթ Ուիլքը որպէս համահեղինակներ:
«Ամերիկայի Հայ Դատի Յանձնախմբի Փասադենայի մասնաճիւղի անունից ես մեր համայնքի երախտագիտութիւնն եմ յայտնում Համագումարի անդամ Հոլդենին` նրա ստանձնած ղեկավարութեան համար` ուղղուած Ադրբեջանի կողմից Արցախի ցեղասպանական շրջափակումը վերացնելու ջանքերին», — նշել է Ամերիկայի Հայ Դատի Եանձնախմբի Փասադենայի նախագահ Շողիկ Եփրեմեանը: «մեր համայնքի շատ անդամներ Հայոց ցեղասպանութիւնը վերապրածների ժառանգներ են, եւ մենք չենք կարող չտեսնել զուգահեռները մարդկութեան դէմ այդ մեծ յանցագործութեան եւ արցախահայութեանը սովի մատնելու Ադրբեջանի փորձերի միջեւ: Մենք ուրախ էինք սերտօրէն համագործակցելու Համագումարի անդամ Հոլդենի հետ` ապահովելու համար այս բանաձեւի ընդունումը Քալիֆորնիայի համագումարի միջոցով, եւ անհամբեր սպասում ենք Քալիֆորնիայի Սենատի իր գործընկերների հետ միասին` ապահովելու այս կարեւոր բանաձեւի հրատապ ընդունումը»:
Ելոյթ ունենալով ի պաշտպանութիւն AJR 1-ի, երեսփոխան Լորայ Ֆրիդմանը, ով ներկայացնում է ամերիկահայ ամենամեծ համայնքը նահանգի օրէնսդիր մարմնում, մեկնաբանել է Արցախի նշանակութիւնը հայ ժողովրդի համար եւ ծաւալուող հումանիտար սարսափելի ճգնաժամը: «արցախը եղել է Հայաստանի աւանդական մասը հազարամեակներ առաջ: Ադրբեջանը չհրահրուած պատերազմ է մղել հայ ժողովրդի դէմ` օգտագործելով Արցախի խաղաղ բնակիչներին որպէս թնդանօթի միս, եւ կտրելով ճանապարհը, որը Արցախում ապրող հայերին ամէն տեսակի պաշարներ հասցնելու հիմնական միջոցն է, նրանք հումանիտար ճգնաժամ են առաջացրել: Տարածաշրջանում ոչ մի այլ պատճառի, քան հայերին այս պատմական տարածքից հեռացնելու փորձի», — նշել է Ֆրիդմանը:
Համագումարի անդամ Դայեան Պապանը, որպէս Քալիֆորնիայի Համագումարի յոյն ծագումով միակ ամերիկուհին, նոյնպէս աջակցում էր AJR 1-ին: «Յոյները երկար ժամանակ կանգնած են եղել հայերի կողքին, եւ ես համաձայն եմ երեսփոխան Ֆրիդմանի հետ, այս շրջափակումը չի կարող հանդուրժուել այլևս:
Համագումարի անդամ Լիւզ Ռիւասը, ով ներկայացնում է Սան Ֆերնանդո Հովտի հայկական մեծ համայնքը, յորդորեց իր գործընկերներին աջակցել AJR 1-ին եւ կոչ արեց ԱՄՆ կառավարութեանը` խիստ միջոցներ ձեռնարկել Ադրբեջանին պատասխանատուութեան ենթարկելու համար:
Ներկայացնելով Ֆրեզնոյի կենսունակ ամերիկահայ համայնքը` Համագումարի անդամ Ջիմ Փաթերսոնը նոյնպէս իր աջակցութիւնն է յայտնել AJR 1-ին: «ֆրեզնոյում մեծ թուով հայեր են ապրում, եւ ես ուրախ եմ նրանց այստեղ ներկայացնել օրէնսդիր մարմնում եւ 8 տարի որպէս Ֆրեզնոյի քաղաքապետ. Սա վրդովմունք է, եւ պէտք է մեր ուշադրութիւնը հրաւիրել: Ես կանգնած եմ հարիւր հազարաւոր հայերի կողքին, ովքեր բնակւում են Կենտրոնական Քալիֆորնիաում եւ Ֆրեզնոյում. սա նրանց համար կենսական մի բան է: Ոչ միայն այն բանի համար, ինչ տեղի է ունենում Արցախում, այլ այն, ինչ կատարւում է Ֆրեզնոյի հայերի սրտերում ու հոգիներում»:
Իր եզրափակիչ խօսքում համագումարի անդամ Հոլդենը կրկնեց շրջափակման ազդեցութիւնը ողջ հայութեան վրայ: «Այնքան շատ մարդիկ, ովքեր ապրում են Քալիֆորնիայում, ովքեր ծագումով հայ են, շարունակում են զգալ ցեղասպանութեան ճնշումն ու ցաւը, որը շարունակւում է նոյնիսկ այսօր, ովքեր ունեն ընտանիքի անդամներ, ովքեր գտնւում են Հայաստանում եւ Արցախում, ովքեր տուժում են: Այն բարձրացել է այն մակարդակին, երբ համաշխարհային հանրութիւնը պէտք է բարձրաձայնի, եւ ոչ միայն բարձրաձայնի, այլ քայլեր ձեռնարկի», — մեկնաբանել է Հոլդենը: «այս բանաձեւը կոչ է անում մեր վարչակազմին ակտիւօրէն միջնորդել եւ ապահովել մարդասիրական օգնութեան առաքումը Արցախի ժողովրդին»:
AJR 1-ն ընդունուել է Վեհաժողովի կողմից Վեհաժողովի դատական յանձնաժողովի կողմից ճնշող աջակցութեամբ ընդունելուց մի քանի օր անց: Յանձնաժողովի լսումների ժամանակ Հայ Դատի Յանձնախմբի Սան Ֆրանցիսկոյի ներկայացուցիչ Խաչիկ Թազեանը եւ Բըրբէնքի Հայ Դատի Յանձնախմբի ներկայացուցիչ՝ Անտրանիկ Ջարչաֆջեանը վկայութիւններ տուեցին ի պաշտպանութիւն AJR 1-ի արագ անցման` խօսելով Արցախի 120,000 հայերի վրայ Ադրբեջանի 109-օրեայ շրջափակման սարսափելի մարդասիրական զոհերի մասին և այն անձնական կապերի մասին որ առկայ է Քալիֆորնիաի միլիոնանոց հայ համայնքի եւ Արցախի ժողովրդի միջեւ:
ՀՅԴ
