Ազգային ժողովի «Քաղաքացիական պայմանագիր» խմբակցությունը մարդու իրավունքների պաշտպանի պաշտոնին առաջադրել է գլխավոր դատախազի տեղակալ Անահիտ Մանասյանի թեկնածությունը։ Այս առիթով մենք մի քանի հարց ուղղեցինք Անահիտ Մանասյանին։
– Թեեւ թե՛ ՄԻՊ-ի, թե՛ գլխավոր դատախազի պաշտոններն իրավաբանի պաշտոններ են, սակայն դատախազը հանրային մեղադրող է, իսկ ՄԻՊ-ը՝ իրավապաշտպան, որը պետք է մարդուն պաշտպանի պետությունից: Այսինքն՝ սրանք իրավաբանի մտածողության երկու տարբեր տեսակներ են։ Որքանո՞վ է նպատակահարմար, որ ՄԻՊ պաշտոնը զբաղեցնի դատախազը։
– Դատախազության եւ դատախազի վերաբերյալ ընկալումները մեր հասարակությունում, կարծում եմ, լուրջ վերափոխման կարիք ունեն։ Դատախազի առաջնային առաքելությունը եւս, ի թիվս այլնի, մարդու իրավունքների պաշտպանությունը, Սահմանադրության եւ սահմանադրական կարգի պահպանումն են։ Դատախազությունում իմ այս կարճ պաշտոնավարման ժամանակահատվածում փորձել եմ իմ ավանդն ունենալ այդ գաղափարի ամրապնդման, ժամանակակից չափանիշներին համապատասխանող դատախազության համակարգի, ինչպես նաեւ դատախազի «օրինակելի» կերպարի ձեւավորման գործում։ Ինչ վերաբերում է իմ մտածողությանը, ապա վերջինս մշտապես կառուցված է եղել սահմանադրական արժեքների եւ սկզբունքների պահպանման ու մարդու իրավունքների պաշտպանության գաղափարի վրա։
– Ձեր կարծիքով՝ Դուք ինչպիսի՞ ՄԻՊ կլինեք, մարդու իրավունքները պաշտպանելիս նրա քաղաքական դիրքորոշումը Ձեզ համար նշանակություն կունենա՞, Դուք կքննադատե՞ք իշխանություններին, եթե դրա կարիքը լինի։
Կարդացեք նաև
– Իմ մասին գնահատականներ հնչեցնելն էթիկապես կոռեկտ չեմ համարում։ Ինչ վերաբերում է մարդկանց քաղաքական դիրքորոշումներին, բնականաբար, դրանք չեն կարող դերակատարություն ունենալ վերջիններիս իրավունքները պաշտպանելիս։ Քննադատական խոսքին էլ վերաբերվում եմ մեծ պատասխանատվությամբ եւ վերջինս եւս երբեւէ չեմ պայմանավորում անձանց հայացքներով, այդ թվում՝ քաղաքական։ Միեւնույն ժամանակ, կարեւոր եմ համարում արձանագրել, որ Մարդու իրավունքների պաշտպանի ինստիտուտի հիմնական գործիքը քննադատական հայտարարություններ հրապարակելը չէ, թեեւ դրանք եւս անհրաժեշտ իրավիճակներում ունեն կարեւոր դերակատարություն։ Գոյություն ունեն նշված ինստիտուտին վերաբերելի մի շարք այլ գործիքներ, որոնց վերաբերյալ, վստահ եմ, բազմիցս կխոսենք առաջիկայում։
Կորյուն ՍԻՄՈՆՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում:
Առանց քաղաքացիական հասարակության կոնսենսուսի ընտրված օմբուցմենը լինելու է պրոբլեմատիկ ու արդյունքում օմբւցմենը զրկվելու է A կարգավիճակից