Science Advances ամսագրում հրապարակված նոր հետազոտությունը ցույց է տվել, որ ավտոմեքենաների արտանետումներից, անտառային հրդեհներից ու ծխախոտի ծխից առաջացած քիմիական նյութերը խաթարում են մաշկային ճարպի արտադրման գործընթացը՝ մեծացնելով էկզեմայի զարգացման հավանականությունը։
Այս բացահայտումը կարևոր է մաշկային այդ հիվանդության բուժման արդյունավետությունը մեծացնելու առումով։ Էկզեման գնալով ավելի է տարածվում և ներկայումս այն մի քանի անգամ ավելի շատ է հանդիպում, քան, օրինակ, 1970-ական թթ։
Էկզեման մաշկի քրոնիկական, հաճախ սրացումներով ուղեկցվող բորբոքային հիվանդություն է։
Կարդացեք նաև
«Կարծում եմ՝ հեղինակները հասկանում են, որ ալերգիկ վիճակներով պայմանավորված հիվանդացությունն աճում է մեր շրջակա միջավայրն աղտոտող տարատեսակ նյութերի աճին զուգընթաց»,- ասել է մանկական ալերգոլոգ և իմունոլոգ Ջեսիկա Հուին՝ Դենվերից։
Շատերը հիվանդանում են էկզեմայով ժառանգական նախատրամադրվածության պատճառով, սակայն նոր հետազոտությունը հենվում է այն կարծիքի վրա, որ քիմիական որոշ նյութեր (դիիզոցիանատ) կարող են հարուցել էկզեմայի այնպիսի ախտանշաններ, ինչպիսիք են ուժեղ քորը, մաշկի կարմրությունը, թաց և ցավոտ ցանը։ Փորձարկումը ցույց է տվել, որ մաշկի որոշակի հատվածի վրա իզոցիանատի ազդեցության արդյունքում խաթարվել է մաշկային ճարպի արտադրությունը, իսկ մաշկային ճարպն, ինչպես հայտնի է, անհրաժեշտ է մաշկի օպտիմալ առողջության համար։
ԱՄՆ Առողջության ազգային ինստիտուտի հետազոտողները «բացահայտել են, որ առողջ մաշկի վրա ապրող բակտերիաները, իզոցիանատի ազդեցությանը ենթարկվելով, պետք է ադապտացվեն՝ գոյատևելու համար»՝ ասվում է հետազոտության մամլո հաղորդագրությունում։ «Երբ այդ մանրէներն ադապտացվում են, ապա որոշակի փոփոխությունների է ենթարկվում նրանց նյութափոխանակությունը՝ դադարեցնելով մաշկի համար անհրաժեշտ լիպիդների արտադրությունը։ Այս բացահայտումը ենթադրում է, որ էկզեման կարելի է բուժել մաշկային մոդիֆիկացված մանրէներն առողջ բակտերիաներով փոխարինելով»։
Պատրաստեց Մարինե ԱԼԵՔՍԱՆՅԱՆԸ
