Ես սովորում եմ Տեխասի «Founders» դասական ակադեմիայի 11-րդ դասարանում: Անցած շաբաթ պատմության ուսուցիչս կարծիք հայտնեց, որ ԱՄՆ Նախագահ Ջո Բայդենի պայքարը քաղաքացիների՝ հրազեն կրելու սահմանադրական իրավունքի դեմ քանդում է Միացյալ Նահանգների հիմնադրման հիմքերը, ինչն էլ կարող է կործանել ամերիկյան պետականությունը:
Ուսուցչիս միտքը, թե սահմանադրական հիմքերից շեղումը կարող է կործանել պետականությունը, հիշեցրեց ինձ Հայաստանի մասին: Հայաստանի Հանրապետության հիմնադրման հիմքերից է՝ Հայկական ԽՍՀ Գերագույն խորհրդի և Լեռնային Ղարաբաղի Ազգային խորհրդի 1989 թվականի դեկտեմբերի 1-ի որոշումը Հայկական ԽՍՀ-ի և Լեռնային Ղարաբաղի վերամիավորման մասին:
Թեպետ Հայաստանի և Արցախի վերամիավորման որոշումը ընդունվել է Խորհրդային Հայաստանի օրոք, այս փաստաթուղթը մեր անկախ պետության ստեղծման հիմքերից է, քանի որ ՀՀ Սահմանադրության նախաբանը հղում է անում Հայաստանի Անկախության հռչակագրին, իսկ Հռչակագիրը հայոց պետականության հիմքերը մատնանշելիս, մասնավորապես, ընդգծում է. «…հիմնվելով 1989 թվականի դեկտեմբերի 1-ի «Հայկական ԽՍՀ-ի և Լեռնային Ղարաբաղի վերամիավորման մասին» Հայկական ԽՍՀ Գերագույն խորհրդի և Լեռնային Ղարաբաղի Ազգային խորհրդի համատեղ որոշման վրա…», որից հետո թվարկում է անկախացող Հայաստանի 12 սկզբունքները:
Այսինքն, Արցախի հայկական լինելը մեր պետականության հիմնարար սկզբունքների և նպատակների շարքին է պատկանում: Այս միտքը հայրենասիրական պոռթկման արդյունք կամ քաղաքական գաղափարախոսություն չէ: Սա Հայաստանի Հանրապետության հիմնադրման իմաստը և հայ ժողովրդի ապագայի նպատակներն ուրվագծող վերքաղաքական աքսիոմներից է:
Կարդացեք նաև
Եթե տարածաշրջանային խաղացողների կամայականությամբ Արցախն ընդգրկվի Ադրբեջանի կազմում, տեղի կունենա ոչ միայն արցախահայության էթնիկ զտում, այլ նաև հայկական պետականության հիմքերի մասնատում:
Պետք է մտածել. ինչպե՞ս ենք ամեն տարի օգոստոսի 23-ին՝ Հայաստանի Անկախության հռչակագրի ընդունման օրը, կարողանալու հպարտորեն կարդալ այդ փաստաթուղթը, եթե դրանում նախանշված հիմքերից մեկը հավասարված լինի գետնին:
Եթե Արցախը չլինի հայկական, հայ ժողովրդի մոտ ահռելի բարոյալքում տեղի կունենա, ինչն էլ կարող է բերել հայկական պետականության անկման:
Արսեն ԱՅՎԱԶՅԱՆ
