Ռուսաստանը կքննարկի Հայաստանից կաթնամթերքի մատակարարումները սահմանափակելու հարցը, քանի որ Հայաստանից եկող կաթնային արտադրանքում որոշակի խախտումներ են հայտնաբերվել: Այս մասին ասվում է «Ռոսսելխոզնադզորի» հաղորդագրության մեջ:
Ըստ գերատեսչության նախնական տեղեկատվության, Հայաստանից արտահանվող կաթնամթերքում օգտագործվում է Իրանում արտադրված հումք, որի նկատմամբ «Ռոսսելխոզնադզորը» որոշակի սահմանափակումներ ունի: Նշվում է, որ գերատեսչության մասնագետները մարտի 20-24-ը տեղի ունեցած ստուգումների ժամանակ հաստատել են այդ փաստը:
Բացի այդ, ըստ գերատեսչության՝ Հայաստանում բացակայում է պատշաճ վերահսկողությունը պետական անասնաբուժական ծառայության կողմից, ինչի արդյունքում «վտանգ կա, որ Ռուսաստան կարող է ներմուծվել անորակ և ոչ անվտանգ արտադրանք»: Նշվում է, որ այդ մասին հայկական կողմը տեղեկացվել է:
Բացի այդ, ռուսական կողմի մոտ «հատուկ մտահոգություն է առաջացնում» այն, որ «առանց ռուսական կողմի հետ համաձայնեցվելու կամ ի հեճուկս պաշտոնական մերժման՝ Մաքսային միության ռեեստրում ներառվել են երրորդ երկրների ձեռնարկություններ»:
Կարդացեք նաև
«Ռոսսելխոզնադզորն» առաջարկել է Հայաստանի համապատասխան տեսչական մարմնին մինչև մարտի 31-ը քննարկել այլ արտադրողների կաթնամթերքի հետագա մատակարարումների իրականացման հնարավորությունը: «Խորհրդակցությունների արդյունքում կորոշվի ՀՀ-ից բոլոր կաթնամթերք արտադրող ձեռնարկությունների կաթնային արտադրանքի մատակարարումների նկատմամբ սահմանափակումներ մտցնելու հարցը»,- ասվում է հաղորդագրության մեջ:
Պատրաստեց Վիկտորյա ԱՆԴՐԵԱՍՅԱՆԸ
