Մենք ի վիճակի չենք միայն հիմնադրամի ռեսուրսներով զբաղվել էպիլեպսիայով հիվանդ երեխաների սոցալիզացիայով, դրանով պետք է զբաղվի պետությունը և մանկական նյարդաբանական ոլորտում պետք է գործի հատուկ ծրագիր, չէ՞ որ այդպիսի երեխաներին հաճախ թաքցնում են հասարակությունից: Այս մասին «Sputnik Արմենիայի» մամուլի կենտրոնում կայացած ասուլիսի ժամանակ ասաց «Կյանքի ճանապարհ» հիմնադրամի նախագահ Ելենա Բաղդասարյանը, որին հարազատ երեխայի հիվանդության պատմությունն է մղել հասարակական գործունեության միջոցով օգտակար լինել էպիլեպսիայով հիվանդ երեխաներին ու նրանց ծնողներին:
Նրա խոսքով, իրենց կազմակերպությունը զբաղվում են այն ամենով, ինչը պետությունը պետպատվերի շրջանակում չի տրամադրում։
«Մի քանի անուն պրիպարատ կա, որը պետությունը տրամադրում է, քանի որ էպիլեպսիային անհրաժեշտ է պրիպարատների շատ լայնածավալ ցանկ: Ընդհանրապես էպիլեպսիան շատ բազմատեսակ հիվանդություն է ու ամեն տեսակը պահանջում է իր դեղորայքային միջոցների մի քանի պրեպարատ: Մենք երեխաներին ապահովում ենք այն պրեպարատներով, որոնք հնարավոր չէ ստանալ պետպատվերի շրջանակներում։ Մենք մեր հովանավորների օգնությամբ ձեռք ենք բերում այդ դեղորայքը և տրամադրում ենք երեխաներին, ովքեր, մեր հիմնադրամի շահառու են հանդիսանում»,-ասաց նա։
Հիշեցնենք, որ մարտի 26-ին նշվում է Էպիլեպսիայի դեմ պայքարի միջազգային օրը, որն այս տարի նվիրված է երեխաներին: Այս հիվանդությամբ տառապողների թիվը հասնում է 70 միլիոնի` Երկիր մոլորակի գրեթե յուրաքանչյուր հարյուրերորդ բնակիչը:
Կարդացեք նաև
«Արաբկիր» բժշկական կենտրոնի մանկական նյարդաբանության բաժանմունքի վարիչ Անի Գևորգյանը տեղեկացրեց, որ 2022 թվականի դեկտեմբերի վերջի դրությամբ գրանցված է 3700 էպիլեպսիայով հիվանդ երեխա։
Նա նշեց, որ «Արաբկիր» բժշկական կենտրոնում գործում է հանրապետական մանկական էպիլեպտոլոգիական դիսպանսեր, որտեղ վերահսկողություն է իրականացվում էպիլեպսիայով երեխանների նկատմամբ: «Դիսպանսերում առկա է էպիլեպսիայով հիվանդ երեխաներին անհրաժեշտ դեղորայքի մեծ մասը, որը տրվում է անվճար։ Դեղորայքի մի մասը տրվում է պետպատվերի շրջանակում, մյուս մասը դիսպանսերի գործընկերների կողմից»,-ասաց մասնագետը` նշելով, որ անհրաժեշտ հետազոտությունների մի մասը ևս կատարվում է պետպատվերի շրջանակում, բուժման անհրաժեշտ թանկարժեք հետազոտությունները վճարովի հիմունքներով է իրականացվում։
Մանկական նյարդաբանության բաժանմունքի վարիչի խոսքով, թյուր կարծիք կա, որ էպիլեպսիան միայն ժառանգաբար փոխանցվող հիվանդություն է, այնինչ էպիլեպսիան կարող է ոչ միայն գենետիկ ծագում ունենալ, այլ կարող է կառուցվածքային լինել, այդ թվում նաև` իմուն համակարգում առաջացած խնդիրներից։ «Գենետիկ ասելով անպայման չի, որ դա ժառանգված լինի ծնողից, այսինքն երեխայի մոտ կարող է լինել իր գեներից սպոնտան մուտացիա, որը կառաջացնի էպիլեպսիա»,-ասաց նա:
Լուսինե ՄԱՐԳԱՐՅԱՆ
