ԱԺ արտաքին հարաբերությունների հանձնաժողովի նիստում ՀՀ կառավարության ծրագրի կատարման 2022թ․-ի արդյունքների մասին զեկույցի քննարկման ժամանակ այսօր վիճաբանություն տեղի ունեցավ ԱԳ նախարար Արարատ Միրզոյանի եւ «Հայաստան» խմբակցության պատգամավոր Ասպրամ Կրպեյանի միջեւ։
Պատգամավորը հարց հնչեցրեց․ «Օրերս ԱԳ նախարարի պաշտոնն օկուպացնող պաշտոնյան հայտարարեց, որ էսկալացիայի վտանգը մեծ է։ Իսկ իշխանությունն օկուպացրած վարչախմբի պարագլուխը հայտարարեց, թե նոր էսկալացիա չի լինելու։ Հիմա ո՞ր մեկդ է ստում։ Ուղիղ պատասխան տվեք ժողովրդին»։
Հանձնաժողովի նախագահ, ՔՊ խմբակցության պատգամավոր Սարգիս Խանդանյանը հորդորեց հարգանքով վերաբերվել ժողովրդի ընտրությանը, ապա հրահանգեց անջատել Կրպեյանի խոսափողը։
Կարդացեք նաև
Արարատ Միրզոյանը պատասխանեց Ասպրամ Կրպեյանին․ «Տիկին պատգամավոր, ձեր մոտ ընկալման խնդիր կա «օկուպացիա» տերմինի։ Ես ԱԳ նախարարի պաշտոնը չեմ օկուպացնում, զբաղեցնում եմ։ Թեեւ լավ հիշում եմ, որ երբ դուք իշխանության մաս էիք, ձեր ԱԳ նախարարն ասում էր, որ «օկուպացնել հնարավոր է անգամ զուգարանը»։ Իմ հետ խոսելիս խնդրում եմ տերմիններին ուշադիր լինել»։
Ասպրամ Կրպեյանն արձագանքեց, որ իր հարցին պատասխան չհնչեց․ «Երբ կսկսեք ՀՀ տարածքային ամբողջականության եւ Արցախի ինքնորոշման իրավունքի պաշտպանության մասին բարձրաձայնել, այդ ժամանակ բարոյական իրավունք կվաստակեք ձեզ արդարացիորեն վերագրվող բնութագրիչները վիճարկելու»։
Լուիզա ՍՈՒՔԻԱՍՅԱՆ
