«Մեր միջազգային գործընկերներին մշտապես ասում ենք, որ մեր անկախության ճանաչման հիմքերը շատ ավելի ամուր են, քան Կոսովոյի եւ մյուս օրինակների դեպքում։ Ով ինչ դիրքորոշում էլ հայտնի, մենք ղեկավարվում ենք Արցախի ժողովրդի կամարտահայտության արդյունքում ձեւավորված տեսակետով»,- Ադրբեջանի կողմից Արցախի շրջափակման 100 օրվա առիթով հրավիրված առցանց մամուլի ասուլիսի ժամանակ այսօր հայտարարեց Արցախի հանրապետության ԱԳ նախարար Սերգեյ Ղազարյանը՝ անդրադառնալով ՌԴ ԱԳ նախարար Սերգեյ Լավրովի տեսակետին, որ ԼՂ հայությանը պետք են այնպիսի երաշխիքներ, որոնք տրվել են, օրինակ, Կոսովոյի ժողովրդին։
Արցախի օկուպացված տարածքներ արցախահայության հնարավոր վերադարձի մասին հարցադրմանն արձագանքելով՝ Սերգեյ Ղազարյանը նշեց, որ ադրբեջանական կողմն ապօրինաբար բնակեցնում է Արցախի բնակավայրերը, որոնք պատերազմի հետեւանքով հիմա օկուպացված են․ «Սա անթույլատրելի է։ Նոյեմբերի իննի փաստաթղթում, այո, կա կետ, որ ստորագրող կողմերը պարտավոր են ՄԱԿ-ի փախստականների հարցերով հանձնակատարի հսկողության ներքո ստեղծել պայմաններ՝ արժանապատիվ վերադարձ ապահովելու համար։ Բայց մեր հայրենակիցները նման իրավիճակում, երբ Ադրբեջանն ամեն օր ուժ կամ ուժի սպառնալիք է կիրառում, նրանց վերադարձը բացառված է։ Առաջնահերթ Ադրբեջանը պետք է պահի եռակողմ հայտարարության պահանջները»։
Սերգեյ Ղազարյանը նաեւ շեշտեց՝ միայն միջազգային ձեւաչափում կարող են տեղի ունենալ Արցախ-Ադրբեջան հանդիպումներ, այլապես Ադրբեջանը խեղաթյուրում է անգամ հումանիտար հարցերի շուրջ հանդիպումները։
Ինչ վերաբերում է Նիկոլ Փաշինյանի պնդմանը, որ միջազգային փաստահավաք առաքելություն է պետք գործուղել Արցախ, Սերգեյ Ղազարյանն ասաց․ «Բոլոր քայլերին, որոնք կուղղվեն իրավիճակը միջազգային ատյաններին տեղ հասցնելուն, մենք միայն կողմ ենք»։
Կարդացեք նաև
Լուիզա ՍՈՒՔԻԱՍՅԱՆ
