«Որքանո՞վ է հնարավոր ադրբեջանցիների եւ հայերի կեցությունը։ Շփման գծի մոտ մենք այսօր խաղաղ բնակչություն ունենք, եւ Ադրբեջանի զինված ուժերն ամեն օր կրակում են խաղաղ բնակիչների վրա, դպրոցների եւ մանկապարտեզների ուղղությամբ։ Ուստի նման պայմաններում ինչպե՞ս է հնարավոր հարեւանությամբ բնակվելու հնարավորության մասին խոսելը»,- Ադրբեջանի կողմից Արցախի շրջափակման 100 օրվա առիթով հրավիրված առցանց մամուլի ասուլիսի ժամանակ այսօր հայտարարեց Արցախի պետնախարար Գուրգեն Ներսիսյանը՝ անդրադառնալով Արցախի բռնազավթված շրջաններ արցախահայության հնարավոր վերադարձի մասին հարցադրմանը։
Գուրգեն Ներսիսյանը շեշտեց, որ Ադրբեջանը միջազգային հարթակներում որպես խաղաղասեր է ներկայանում, իսկ զուգահեռ իրականությունում արցախահայության հանդեպ էթնիկ զտումներ է անում․ «Արցախն Ադրբեջանին պետք է առանց արցախցիների։ Ուստի նախկին բնակավայրեր վերադառնալու մասին խոսելն անիմաստ է։ Դա ոչ թե քմահաճույք է կամ ցանկություն, այլ իրականություն․ վտանգն ամենօրյա է եւ իրական։ Սա Ադրբեջանի ասած «ինտեգրացիայի» ժանրից է, որով Ադրբեջանը փորձում է միջազգային հանրությանը ցույց տալ, թե ինքն իբրեւ խաղաղության կողմնակից է»։
Լուիզա ՍՈՒՔԻԱՍՅԱՆ
Կարդացեք նաև
