Ամերիկյան «Christian Broadcasting Corporation» (CBN) հեռուստաընկերությունը երկուշաբթի Արցախի շրջափակման և արցախահայությանը սպառնացող վտանգի մասին ռեպորտաժ է հեռարձակել: Հեռուստաընկերության լրատվական ծառայության այդ օրվա թողարկումը մեկ օրվա ընթացքում Յութուբում հավաքել է ավելի քան 100.000 դիտում:
Կազմակերպության պաշտոնական կայքէջը հայտնում է, որ հեռուստաընկերությունն ունի քրիստոնեական ուղղվածություն: Առաջնային նպատակներից է՝ լուսաբանել աշխարհի քրիստոնյաներին առնչվող իրադարձությունները:
Արցախի անօրինական շրջափակման մասին պատմող ռեպորտաժը ներկայացնելիս մեկնաբանն ասում է. «Հասունացող ճգնաժամ և ոչնչացման վտանգ քրիստոնյանների համար»:
Ռեպորտաժի խոսնակներից է Միացյալ Թագավորության Խորհրդարանի Լորդերի պալատի անդամ, բարոնուհի Քերոլայն Քոքսը, որը Հայաստանին և Արցախին աջակցում է դեռ արցախյան առաջին ազատամարտից: Բրիտանացի օրենսդիրը տեսանյութում խոսում է ցեղասպանության մոտալուտ վտանգի մասին:
Կարդացեք նաև
«Իրողությունը հիմա շատ լուրջ է: Շատերի կողմից ասվում է, որ այս ամենը մոտեցող ցեղասպանության մասին է խոսում: Ադրբեջանի ագրեսիան հայերի դեմ շարունակական բնույթ է կրում: Պետք է նշել, որ Լեռնային Ղարաբաղն Ադրբեջանի կազմում ընդգրկվել է Ստալինի կողմից: Այդ ժամանակներից սկսած՝ Ադրբեջանը ցանկանում է Լեռնային Ղարաբաղը էթնիկ զտման ենթարկել», – իր խոսքում շեշտում է Քերոլայն Քոքսը:
Բարոնուհի Քոքսը զգուշացնում է Լեռնային Ղարաբաղում քրիստոնեական ժառանգության, պատմական վայրերի և հայկական մշակույթի ոչնչացման սպառնալիքի մասին: Նա նշում է. «Սա կարող է ցեղասպանության, քրիստոնյաների և քրիստոնեական ժառանգության վերացման հերթական փուլը լինել: Մենք պետք է աղոթենք: Այդտեղի քրիստոնյաներից ձերբազատվելը Ադրբեջանի օրակարգի մաս է կազմում: Հայերին հենց դա է մտահոգում, որովհետև նրանք կկորցնեն իրենց քրիստոնեական յուրահատուկ ժառանգության մի մասը»:
Ռեպորտաժն անդրադառնում է նաև Արցախում դեղորայքի և բժշկական պատշաճ օգնության բացակայությանը: Մասնավորապես, Արցախի բնակիչ Գայանե Բեգլարյանը պատմում է, որ լյարդի քաղցկեղ ունեցող իր 4-ամյա աղջկան հաջողվել է Հայաստան տեղափոխել միայն Կարմիր խաչի միջնորդության շնորհիվ: Գայանե Բեգլարյանը նյութում ընդգծում է, որ կարևոր բուժօգնության անհասանելիության պատճառով հազարավոր մարդիկ անօգնության են մատնված: «Մենք չունենք անհրաժեշտ սարքավորումները: Չունենք նաև անհրաժեշտ բժիշկներին: Քանի դեռ ճանապարհը փակ է, ոչ մենք կարող ենք գնալ, ոչ էլ օգնությունը կարող է այստեղ գալ», – ասում է Արցախի բնակիչը:
CBN-ը թերևս ամերիկյան միակ լրատվամիջոցն է, որն այսչափ ծավալուն անդրադարձ է կատարել Լաչինի միջանցքի արգելափակման վերաբերյալ:
Արսեն ԱՅՎԱԶՅԱՆ
