Shamshyan.com. ՀՀ ներքին գործերի նախարարության Պարեկային Ծառայության Երևան քաղաքի գնդի 4-րդ գումարտակի 1-ին վաշտի պարեկներ Հենրիկ Աբրոյանն ու Անդրանիկ Չոբանյանն այսօր՝ մարտի 21-ին, ժամը 00։30-ի սահմաններում Պռոշյան փողոցում ծառայություն կատարելու ժամանակ նկատում են, որ Porsche Cayenne մակնիշի 07 GT 777 համարանիշի ավտոմեքենայի վարորդը սխալ ձևով է շարքերի վերադասավորում կատարում։
Պարեկները կանգնեցնում են վարորդին, նրանից պահանջում վարորդական իրավունքի վկայականն, ապա, քանի որ կասկած է առաջանում, որ հնարավոր է՝ նա գտնվում է ոչ սթափ վիճակում, նրանից պահանջում են սթափության թեստ հանձնել։
Վարորդ՝ Երևանի բնակիչ 43-ամյա Ալեքսանդր Բ․-ն, հրաժարվում է սթափության թեստ հանձնելուց, սկսում է համոզել պարեկներին, որպեսզի իրեն բաց թողնեն։ Սակայն տեսնելով, որ պարեկները պնդում են, որ պետք է նա անպայման հանձնի սթափության թեստ, նա գրպանից հանում է 3 հատ 20 հազարանոց ՀՀ թղթադրամ, գցում պարեկների ծառայողական ավտոմեքենայի մեջ, ասում․ «Տղե՛ք, էս վերցրեք, դուք ինձ չեք տեսել, խմածությանս պահն էլ ջրեք, թող գնա»։
Պարեկները նրան տեղափոխում են Ոստիկանության Կենտրոնական բաժին, որտեղ նա ենթարկվում է սթափության փորձաքննության։ Պարզվում է, որ նա եղել է ոչ սթափ։
Լուսանկարը՝ Կարեն Գրիգորյանի
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի՝ օրինական ուժի մեջ մտած դատավճռով։
Նյութն ամբողջությամբ՝ սկզբնաղբյուր կայքում
