Երևանի թատրոնի և կինոյի պետական ինստիտուտի ուսանողները դասադուլ են անում: Ըստ ուսանողների, բուհի ռեկտորի պաշտոնակատար Լիլիթ Արզումանյանն արգելել է իրենց դասախոս, Հայաստանի ժողովրդական արտիստ Նիկոլայ Ծատուրյանի ղեկավարած երրորդ կուրսի ներկայացումը, որը բեմադրվել է ժամանակակից գրող Էդգար Կոստանդյանի «Որբանոց» ստեղծագործության հիման վրա:
Ուսանողները կարծում են, որ արգելքը տեղին չէ։
Aravot.am-ի հետ թեմայի վերաբերյալ զրույցում Լիլիթ Արզումանյանը հետեւյալը փոխանցեց. «Խոսքն ընդամենը կուրսային ներկայացման մասին է, որը մեր բեմում երկու օր խաղացել են, Նիկոլայ Ծատուրյանի «Որբանոցն» է: Դրանից հետո ես արձագանքներ եմ ստացել, որ դա խայտառակություն էր, հայհոյանքներ կան: Այնուհետեւ արել եմ ռեկտորատի նիստ, հրավիրված են եղել ռեկտորատի անդամները, բոլոր կուրսերի ղեկավարները: Հարցը հետեւյալ կերպ եմ դրել՝ արդյոք կրթական հաստատությունում, ուսումնական թատրոնում պետք է հնչեն հայհոյանքներ: Որոշում է կայացվել երկու կետից, որ այսուհետ անընդունելի համարել ուսանողական թատրոնի բեմից նման արտահայտությունները ( բ-ի տղա եւ այլն), հանձնարարել ամբիոնի վարիչին դիպլոմային եւ կուրսային աշխատանքների գրական հիմքերը նախապես քննարկել»:
Լիլիթ Արզումանյանը հավելեց, որ դրանից հետո Նիկոլայ Ծատուրյանն իր ուսանողների մոտ հայտարարել է, թե Արզումանյանը փակել է ներկայացումը: «Այս բուհը խաղարկային թատրոն չունի, որ խաղացանկում էլ լինի ներկայացում, այսինքն ի՞նչն եմ փակել: Ուրիշ կուրսային աշխատանքներ մեկ անգամ են բեմադրվում, սա երկու անգամ է բեմադրվել: Այժմ Ծատուրյանի կուրսը դասադուլ է անում, թե Լիլիթ Արզումանյանը արգելել է: Նիկոլայ Ծատուրյանն ասել է, որ իր հետ չունեմ, որովհետեւ ինքը չի շնորհավորել ինձ ռեկտոր ընտրվելիս… Մի խայտառակ վիճակ է ստեղծվել: Նախարարությունն ինձանից հաշվետվություն է պահանջել, նամակ եմ գրել-ուղարկել: Լրագրողներին էլ առաջարկում եմ փակ դիմում լինի, գան այդ ներկայացումը նայելու: Իմ մեղքը ո՞րն է, որ մեր բեմից չե՞մ ուզում հայհոյանք հնչի: Ոնց կարելի է մանկավարժը ուսանողներին ուղղորդի նման խայտառակության»:
Կարդացեք նաև
Նիկոլայ Ծատուրյան
Լրագրողների հետ զրույցում Նիկոլայ Ծատուրյանն ասաց, թե դեռեւս դուրս չենք եկել սովետական վիճակներից. «Մեզ մոտ շարունակվում է «սովետի» կարգավիճակը: Եթե նորովի չմտածենք, կմնանք էս ճահճում… Ինստիտուտն էլ է դեռ սովետական օրենքներով շարժվում, ասես միջնադար լինի: Աբսուրդն այն է, որ հանձնաժողովը չի նայել ներկայացումը, բայց նստած քննարկում է այն…Ա վելի մեծ նոնսենս հնարավոր չէ պատկերացնել»:
Ծատուրյանը հավելում է, «բ-ի տղա» արտահայտության մեջ որեւէ արտառոց բան չկա: «Իմ բնավորությունն այնպիսին է, որ չեմ սիրում քծնել, երբ իրեն ռեկտոր նշանակեցին, չգնացի ասելու՝ վայ ինչ ուրախ եմ, որ ընտրվել եք»,-ասաց նա՝ ակնարկելով, որ իր եւ ռեկտորի խնդիրները անձնական դաշտում են:
Գոհար ՀԱԿՈԲՅԱՆ
Նիկոլայ Ծատուրյանը հայտնի է իր գռեհիկ ներկայացումներով, դասերին չի գալիս հաճախ, լսեք նրա խոսելաձևը, առհասարակ ռեկտորի մեղավորությունն այնտեղ է, որ պետք է թույլ չտա այդ մարդը ոտք դնի ինստիտուտ, նրա տարիքը թույլ չի տա նորմալ մանկավարժությամբ զբաղվել: Շատ ճիշտ որոշում է: