Aravot.am-ի տեղեկություններով, Գեղարքունիքի մարզի դատախազությունում՝ պետական շահերի հայց հարուցելու լիազորության շրջանակներում ուսումնասիրության արդյունքում պարզվել է, որ 25 տարի առաջ՝ 1998թ.-ին փաստաթղթեր են կեղծվել։ Այսպես, Մարտունու պետական նոտարական գրասենյակի պետական նոտար Ա. Ա․–ն քաղաքացուհիներից մեկի միակ ժառանգ է ճանաչել Հ․ Հ․-ին՝ տրամադրելով ժառանգության իրավունքի վկայագիր։ Արդյունքում, Մարտունի քաղաքի կենտրոնական հիվանդանոցի հարեւանությամբ գտնվող 6.5 հա մակերեսով մարզադաշտի նկատմամբ գրանցվել է վարձակալության իրավունք, իսկ 1980.55 քմ մակերեսով մարզադաշտի տրիբունայի նկատմամբ սեփականության իրավունք: Սակայն պարզվել է, որ ըստ ՀՀ կադաստրի կոմիտեից ստացված տեղեկանքի՝ նշված հասցեում այդ քաղաքացու անվամբ պետական գրանցում առկա չէ:
2009թ-ին հիշյալ 6.5 հա մակերեսով մարզադաշտի նկատմամբ գրանցվել է վարձակալության իրավունք, իսկ 1980.55 քմ. մակերեսով մարզադաշտի տրիբունան չափագրման արդյունքում դառնալով 1068 քմ՝ գրանցվել է սեփականության իրավունք։
Փաստի առթիվ Հայաստանի քննչական կոմիտեի Մարտունու քննչական բաժնում «ՀՀ քրեական օրենսգրքի» 457 հոդվածի 2-րդ մասի (փաստաթղթեր, դրոշմներ, կնիքներ, ձեւաթղթեր կեղծելը կամ կեղծ փաստաթղթեր, դրոշմներ, կնիքներ, ձեւաթղթեր իրացնելը, պատրաստելը կամ օգտագործելը, որը կատարվել է մի խումբ անձանց կողմից նախնական համաձայնությամբ) հատկանիշներով նախաձեռնվել է քրեական վարույթ։
Արմեն ԴԱՎԹՅԱՆ
