Նոր Նորքի այգում պարեկների կողմից խուզարկված կինը Նինա Ղանդիլյանն է` Ազգային ժողովրդավարական բեւեռ շարժման անդամ:
Նա գիտական 56 աշխատության հեղինակ է, այժմ ԵՊՀ պատմության ֆակուլտետի ուսանող (արվեստի ամբիոն): Aravot.am-ի հետ զրույցում պատմեց, որ հիմա աշխատում է իր երկրորդ ատենախոսության վրա, դեպքի օրը հոգնած էր, որոշել էր աշխատանքը շարունակել մաքուր օդում:
«Չեմ բացառում, ինչո՞ւ ոչ, որովհետեւ շատերին են հետապնդում»,- մեր հարցին՝ միգուցե Ազգային ժողովրդավարական բեւեռի անդամ լինելու պատճառո՞վ էին պարեկները ձեզ խուզարկում, այսպես արձագանքեց Նինա Ղանդիլյանը:
Նրա պատմելով՝ այն, ինչ տեսանք իր տարածած հայտնի տեսանյութում, ավելի մեղմ էր. «Ավելի վատ էին իրենց պահում մինչեւ տեսաձայնագրությունը: Մինչ այս՝ որեւէ տեսագրություն համացանց չեմ գցել: Երբ պահանջեցին՝ բացեմ պայուսակս, գրպաններս ցույց տամ, մտածեցի՝ ինչ որ բան չգցեն գրպանս, դրա համար սկսեցի տեսաձայնագրել: Հետո որոշեցի հրապարակել, որ նման երեւույթը համատարած չլինի»:
Կարդացեք նաև
Անդրադառնալով իր տեսանյութին համացանցում հաջորդած մեկնաբանություններին, որոնք հիմնականում պարեկներին ուղղված քննադատություն էր, մեր զրուցակիցը շարունակեց. «Հիմնականում դատապարտում են ոստիկանների պահվածքը, բայց ցանկանում եմ ասել, որ ես իրենց ավելի շատ որպես երեխեքի եմ վերաբերվում: Ո՞վ է իրենց սովորեցրել: Ո՞վ է այդքան շատ ոստիկան մեր հարկերով պահում ու կարգին էլ չեն սովորեցնում, ուղարկում են գործի: Ավելի շատ իմ վրդովմունքը իրենց ղեկավարությանն է ուղղված եղել: Չարժե վատ խոսքերով վիրավորել այդ երեխեքին, այդ ջահել աղջիկներին: Ինչ կատարվում է՝ ընդհանուր երկրում է կատարվում, ընդհանուր համակարգում»:
Արփինե ՍԻՄՈՆՅԱՆ
Հ. Գ. Այգում գիրք կարդացող կնոջն անօրինական հիմքով, առանց ընթերակաների մասնակցության, անձնական խուզարկության ենթարկած ոստիկանության ծառայողների նկատմամբ ծառայողական քննություն է նշանակվել։ ՀՀ ՆԳՆ ոստիկանությունից «Փաստինֆո»-ի հետ զրույցում հայտնել են, որ հենց տեսանյութի տարածման օրը ՆԳՆ ոստիկանության պետ Արամ Հովհաննիսյանի հանձնարարականով՝ ծառայողական քննություն է նշանակվել։
