Ֆուտբոլի Հայաստանի ազգային հավաքականի նորանշանակ գլխավոր մարզիչ Ալեքսանդր Պետրակովը ՈՒԵՖԱ Եվրոպայի 2024 թվականի առաջնության որակավորման փուլի Հայաստան-Թուրքիա հանդիպումից առաջ Հայաստանում իր առաջին մամուլի ասուլիսն սկսեց հավաքական հրավիրված ֆուտբոլիստների ցուցակը հրապարակումով, որից հետո պատասխանեց լրատվամիջոցների հարցերին:
Հավաքական հրավիրվել է 26 ֆուտբոլիստ:
Դարպասապահներ. Ստանիսլավ Բուչնեւ, Արսեն Բեգլարյան, Արման Ներսեսյան:
Պաշտպաններ. Վարազդատ Հարոյան, Անդրե Չալըշըր, Կամո Հովհաննիսյան, Նաիր Տիկնիզյան, Գեորգի Հարությունյան, Տարոն Ոսկանյան, Շիրայր Մարգարյան, Էրիկ Փիլոյան, Երջանիկ Ղուբասարյան:
Կարդացեք նաև
Կիսապաշտպաններ. Էդուարդ Սպերցյան, Խորեն Բայրամյան, Լուկաս Սելարայան, Տիգրան Բարսեղյան, Էդգար Բաբայան, Ժիրայր Շաղոյան, Վահան Բիչախչյան, Դավիդ Դավիդյան, Ուգոչուկվո Իվու, Կարեն Մուրադյան, Արթուր Սերոբյան:
Հարձակվողներ. Նորբերտո Բրիասկո Բալեկյան, Սարգիս Ադամյան, Հրանտ-Լեոն Ռանոս:
Հավաքականի մարզական հավաքը կմեկնարկի մարտի 18-ին:
Հարցին, թե ՀՖՖ ղեկավարությունը ի՞նչ պահանջներ է դրել իր առջեւ, Պետրակովը պատասխանեց, որ ֆեդերացիայի նախագահը առաջադրանք դրել է՝ փորձել մտնել 2024 թ.Եվրոպայի առաջնության եզրափակիչ:
Լրագրողը, նշելով առաջիկա հանդիպման կարեւորությունը՝ հետաքրքրվեց, թե ինչ է անելու, որպեսզի ֆուտբոլիստները զերծ մնան քաղաքականացվելուց եւ դաշտում միայն ֆուտբոլ խաղան; «Ես նույնպես կողմնակից եմ, որպեսզի առաջին պլանում լինեն սպորտը, թիմի մարզական շահերը: Փորձառու ֆուտբոլիստներ են, նրանք գիտեն իրենց պատմությունը: Շատերը ժամանելու են արտերկրից, որտեղ հայտնվել են ոչ սեփական կամքով: Դա իրենց նախնիների պատմությունն է, որը իրենք գիտեն:: Ես էլ գիտեմ ձեր պատմությունը: Սակայն ավելորդ էմոցիան կարող է բացասաբար անդրադառնալ խաղի վրա: Իմ համար, կներեք, առաջին պլանում միայն սպորտն է»,-պատասխանեց մարզիչը:
Խոսելով հրավիրված նորեկների եւ հավաքականում նրանց անելիքների մասին՝ պարոն Պետրակովը նշեց, որ արդեն երկու ամիս այստեղ է, հետեւել է Հայաստանի առաջնությանը: Նա ծանոթ է ֆուտբոլիստներին: Լեգեոներականներին էլ հրավիրել է նրանց տեսնելու համար, քանի որ տեսագրությունները եւ հեռախոսազրույցները երբեք չեն կարող փոխարինել անմիջական շփումներին:
Անդրադարձ եղավ նաեւ մեր ենթախմբին: «Թույլ ենթախմբեր չեն կարող լինել: Ֆավորիտը, ինքներդ էլ հասկանում եք, միանշանակ աշխարհի առաջնության բրոնզե մրցանակակիր Խորվաթիայի հավաքականն է: Սակայն ինչպիսին կլինի դասավորությունը ենթախմբում, դժվար է ասել: Ես հարգում եմ բոլոր մրցակիցներին: Բայց սա ֆուտբոլ է: Նաեւ ցանկալի է, որ սկզբից մի փոքր հաջողությունը մեզ ժպտար»,-ասաց նա::
Հարցին, թե Հենրիխ Մխիթարյանին հավաքականում տեսնո՞ւմ է, նրա հետ արդյո՞ք խոսել է եւ եթե այո, ինչ պատասխան է նրանից լսել, Պետրակովը պատասխանեց. «Հայաստան գալուս առաջին օրվանից ցանկացել եմ կապվել Հենրիխ Մխիթարյանի հետ եւ անձամբ զրուցելու հնարավորություն ունենալ: Նա մերժեց եւ ասաց, որ իր որոշումը կայացրել է եւ փոխելու ցանկություն չունի: Ես իմ օգնական Ռոման Բերեզովսկուն, որը խաղացել նրա հետ, որպես անձնական խնդրանք, դիմեցի, որ ինքը խոսի: Սակայն Ռոմային էլ Մխիթարյանն ասել է, թե ավարտել է մրցելույթները հավաքականում, Հայաստանին մաղթել է հաջողություն: Ես այլ մարդկանց միջոցով էլ ցանկացել եմ դուրս գալ նրա վրա, պատրաստ եմ եղել ինքս թռչել նրա մոտ՝ Միլան: Բայց նա շփվել չցանկացավ: Այնպես որ, ես իմ կողմից ամեն բան արել եմ, բայց ֆուտբոլիստը չի ցանկացել ինձ հետ խոսել:
Ես գտնում եմ, որ պետք է հարգել Հենրիխ Մխիթարյանի որոշումը, որը բացառիկ ֆուտբոլիստ է Հայաստանի համար: Ես նրան անձամբ չեմ ճանաչում, սակայն Դոնեցկի «Շախտյորի» տղաներն ինձ ասում են, որ նա պարկեշտ մարդ է»:
Աշոտ ՀԱԿՈԲՅԱՆ
