2022 թվականին մենք շարունակել ենք առերեսվել համավարակի եւ պատերազմի հետեւանքով ստեղծված խնդիրներին: Այս համատեքստում աշխատանքներ են իրականացվել պատշաճ կազմակերպելու բուժօգնությունը: Այս մասին ասել է ՀՀ առողջապահության նախարար Անահիտ Ավանեսյանը` Առողջապահության հարցերի մշտական հանձնաժողովի` մարտի 16-ի նիստում ներկայացնելով «Հայաստանի Հանրապետության կառավարության ծրագրի (2021-2026 թթ.) 2022 թվականի կատարման ընթացքի եւ արդյունքների մասին» զեկույցը:
2022 թվականին շրջանառության մեջ են դրվել ոլորտի հնգամյա ռազմավարությունը եւ Համապարփակ առողջապահական ապահովագրության հայեցակարգը, որոնք ընդունվել են 2023 թվականի հունվարին: Հաշվետու ժամանակահատվածում հաստատվել են Առողջության առաջնային պահպանման օղակի բարեփոխումների միջոցառումների ծրագիրը, ինչպես նաեւ Առողջապահական ծառայությունների որակի բարելավման ռազմավարությունը եւ դրանից բխող գործողությունների ծրագիրը: «Հաստատվել են նաեւ Շաքարային դիաբետի եւ դրա բարդությունների կանխարգելման ազգային ռազմավարությունը, դրա իրականացման միջոցառումների ծրագիրը, ինչպես նաեւ Մայրական եւ վերարտադրողական առողջության պահպանման ռազմավարությունը եւ դրանից բխող միջոցառումների պլանը»,- ընդգծել է նախարարը:
Անդրադառնալով պետպատվերի շրջանակում իրականացվող ծառայությունների ծավալին` զեկուցողը տեղեկացրել է. «2022 թվականին պետպատվերի շրջանակում հիվանդանոցային եւ դժվարամատչելի հետազոտությունների բժշկական օգնության եւ սպասարկման դեպքերի թիվը կազմել է 786 հազար 864` 2018 թվականի համեմատ աճելով 125 տոկոսով»: Ըստ Անահիտ Ավանեսյանի` դա ցույց է տալիս Կառավարության` առողջապահության բնագավառին հատկացվող միջոցները տարեցտարի ավելացնելու հանձնառությունը:
Նախարարը մանրամասն ներկայացրել է հաշվետու ժամանակահատվածում կատարված աշխատանքները, համակարգում նոր ծառայությունների իրականացումը: 2022 թվականին մեկնարկել է կոլոռեկտալ քաղցկեղի վաղ հայտնաբերման սքրինինգային փորձարարական ծրագիրը, որի շնորհիվ իրականացվել է 2096 հետազոտություն: 2022 թվականին մարզերում ընթացել են 13 բժշկական հաստատության շինարարական աշխատանքներ: Նախարարը պատասխանել է պատգամավորների հարցերին: Դրանք վերաբերել են զեկույցին, նորանուն դեղերի գրանցմանը, 44-օրյա պատերազմի ընթացքում վիրավորում ստացած անձանց մատուցված ծառայություններին, պատվաստումների իրականացման անհրաժեշտությանը եւ այլն:
Կարդացեք նաև
Հանձնաժողովի նախագահ Նարեկ Զեյնալյանը կարեւորել է հաշվետու ժամանակահատվածում մարզերում բժշկական հաստատությունների կառուցման, վերակառուցման եւ վերազինման աշխատանքների իրականացումը: «Սա չափազանց կարեւոր է եւ ուղղված է բժշկական ծառայությունների հասանելիության բարձրացմանն ու առողջապահական համակարգի հավասար զարգացմանը»,- ընդգծել է պատգամավորը:
Զեկույցն ընդունվել է ի գիտություն:
ՀՀ Ազգային ժողով
