Հայաստանը փորձում է Լեռնային Ղարաբաղի ճակատագրի պատասխանատվությունը բարդել երրորդ երկրների վրա: Այս մասին հայտարարել է Ռուսաստանի ԱԳՆ խոսնակ Մարիա Զախարովան` մեկնաբանելով Հայաստանի վարչապետի այն հայտարարությունը, որ Ռուսաստանը Արցախի անվտանգության երաշխավորն է:
Զախարովան ասել է, որ Ռուսաստանի պարտավորություններն ամրագրված են նոյեմբերի 9-ի հայտարարությամբ, և բավական է միայն նայել փաստաթղթին` հասկանալու համար` ով ինչ պարտավորություն ունի:
«Ռուս խաղաղապահներն անում են իրենցից կախված ամեն բան, որպեսզի թույլ չտան էսկալացիա և տեղում կայունացնեն իրավիճակը: Դա անում են իրենց պատասխանատվության գոտում: Իհարկե, շատ բան կախված է նաև բոլոր ներգրավված կողմերի գործողություններից և հայտարարություններից: Մենք կարծում ենք, որ այդ հայտարարությունները պետք է լինեն կառուցողական և ուղղված լինեն ընդհանուր նպատակին»,- ասել է նա:
Ըստ Զախարովայի` Փաշինյանի հայտարարությանը իրենք նայում են որպես նույն գծի շարունակություն, որը որդեգրվել էր Պրահայում: «Ուստի հայկական կողմի, Հայաստանի ղեկավարության խղճին ենք թողնում ԼՂ ճակատագրի համար պատասխանատվությունը երրորդ երկրների վրա բարդելու փորձերը»,- ասել է Զախարովան:
Կարդացեք նաև
Հարցին` արդյոք պետք է Ռուսաստանը պաշտպանի Ղարաբաղը, եթե Ադրբեջանը փորձի վերահսկողության տակ վերցնել խաղաղապահների վերահսկողության տակ գտնվող տարածքները, Զախարովան ասել է, որ ինքը մեկնաբանում է այն, ինչ տեղի է ունենում:
«Պատմել` ինչ կլինի, եթե նման բան լինի, անտեղի է և տվյալ դեպքում շատ վտանգավոր,- ասել է նա: – Կլինի ինչ-որ բան, որը արձագանք կպահանջի` մենք դա կտանք: Մոդելավորմամբ զբաղվելը չափազանց վտանգավոր է»:
Պատրաստեց Վիկտորյա ԱՆԴՐԵԱՍՅԱՆԸ
