Եվրոպական խորհրդարանը ձայների 534 «կողմ», 10 «դեմ» և 66 «ձեռնպահ» հարաբերակցությամբ ընդունեց ՀՀ-ԵՄ հարաբերությունների վերաբերյալ զեկույցը:
Զեկույցի հեղինակն է Եվրոպական խորհրդարանում Հայաստանի հարցերով մշտական զեկուցող Անդրեյ Կովաչևը: Զեկույցում բանավոր փոփոխություններ առաջարկվեցին, որոնք ընդունվեցին: Ուստի փաստաթղթում ամրագրված է, որ Ադրբեջանը դատապարտվում է Լաչինի միջանցքի շրջափակման համար, ինչպես նաև դատապարտվում է մարտի 5-ին տեղի ունեցած միջադեպը, որը հանգեցրեց զոհերի՝ վտանգի տակ դնելով խաղաղության հաստատման գործընթացը:
Զեկույցում մասնավորապես ամրագրված է. «Ադրբեջանի ռազմական գործողությունները հաջորդում են Ադրբեջանի իշխանությունների մտահոգիչ հայտարարություններին, որոնք վերաբերում են ՀՀ տարածքը՝ որպես ադրբեջանական նախնիների հող համարելուն և սպառնում են ուժ կիրառել՝ հաշվի առնելով, որ 2022 թվականի դեկտեմբերից Հայաստանի և Լեռնային Ղարաբաղի միջև քաղաքացիական երթևեկությունը Լաչինի միջանցքով արգելափակվել է, ինչը բացասաբար է ազդել տարածաշրջան սննդամթերքի և այլ անհրաժեշտ պարագաների և ծառայությունների մատակարարումների վրա»:
Բանաձևում Եվրոպական խորհրդարանը խստորեն դատապարտում է 2022-ի սեպտեմբերին Ադրբեջանի լայնածավալ ռազմական ագրեսիան Հայաստանի ինքնիշխան տարածքում բազմաթիվ վայրերի նկատմամբ, որը հրադադարի լրջագույն խախտում էր և հակասում էր ավելի վաղ ստանձնած պարտավորություններին, այդ թվում՝ ԵՄ միջնորդությամբ ընդունված բանակցությունների շրջանակում: Փաստաթղթում ամրագրված է. «Եվրոպական խորհրդարանը դատապարտում է 2021-ի մայիսից սկսած ռազմական ներխուժումը ՀՀ-ի՝ միջազգայնորեն ճանաչված տարածք: Վերջին՝ սեպտեմբերյան ագրեսիան ուղղակի կապ չունի Լեռնային Ղարաբաղի շուրջ տեւական հակամարտության հետ»: Այս բանաձևով Եվրոպական խորհրդարանը պահանջում է Ադրբեջանին վերացնել ցանկացած խոչընդոտ՝ Լաչինի միջանցքով տեղաշարժի ազատության և անվտանգության հետ կապված:
Կարդացեք նաև
Եվրոպական խորհրդարանն առաջարկում է նաև Լեռնային Ղարաբաղում հայ բնակչության և բոլոր վերադարձողների անվտանգության ապահովման երաշխիքի միջազգային ժամանակավոր մեխանիզմի ստեղծում:
Փաստաթղթով Եվրոպական խորհրդարանն աջակցում է ՀՀ-Թուրքիա հարաբերությունների կարգավորմանը՝ ողջունելով մինչ այժմ ձեռք բերված առաջընթացը, ներառյալ երկու երկրների միջև թռիչքների վերսկսումը:
Եվրոպական խորհրդարանի բանաձևում նաև անդրադարձ կա ՀՀ- Իրան հարաբերություններին: Մասնավորապես ԵԽ-ն դիմելով ՀՀ իշխանություններին, նշում է. «ՀՀ իշխանությունների ուշադրությունը հրավիրվում է իրանական ավտորիտար ռեժիմի հետ համագործակցության ռիսկերի վրա, որը, ի թիվս այլ հանցագործությունների և խախտումների, ռազմական տեխնիկայի մատակարարն է, որն օգտագործվում է Ռուսաստանի կողմից Ուկրաինայի դեմ ագրեսիայի պատերազմում»։
Եվրոպական խորհրդարանը նաև զգուշացնում է, որ ի գիտություն են ընդունվում որոշ հասարակական կազմակերպությունների և ընդդիմության ներկայացուցիչների զեկույցները, որոնք բացահայտում են հետընթացի հնարավոր ռիսկը, գոնե որոշ ոլորտներում և կոչ է անում ՀՀ կառավարությանը տեսանելի առաջընթաց գրանցել այս ոլորտներում: Եվրոպական խորհրդարանը ՀՀ իշխանություններին կոչ է անում ավարտին հասցնել ցուցարարների, լրագրողների, ընդդիմադիր գործիչների և քաղաքացիական ակտիվիստների նկատմամբ ոստիկանության կողմից ուժի չարաշահման ենթադրյալ դեպքերի բազմակողմանի հետաքննությունը:
Տաթև ՀԱՐՈՒԹՅՈՒՆՅԱՆ
