Երեւանի ավագանու այսօրվա նիստում որոշում ընդունվեց Երեւանի համար 116 հիմնական դպրոցն անվանակոչել դպրոցի շրջանավարտ, 2016 թվականի արցախյան քառօրյա պատերազմի մասնակից Սամվել Հովսեփյանի անվամբ։
Սամվել Հովսեփյանը 1989-1994թթ. մասնակցել է Արցախի համար մղված ազատագրական եւ ՀՀ սահմանամերձ շրջանների ինքնապաշտպանական մարտերին։ 2016թ. մասնակցել է ապրիլյան քառօրյա պատերազմին: Նա մահացել է 2016-ի նոյեմբերի 9-ին։
ԵԿՄ նախագահ Սասուն Միքայելյանը, որը ներկա է նիստին, ասաց՝ Սամվել Հովսեփյանին մարտական ընկերները Ադմիրալ Սամո էին ասում․ «Մի քանի բառով մեր սերնդից խոսեմ, թող վիրավորական չլինի, մեր սերունդը տվեց դարի ասպետներ, մենք կարողացանք գրեթե 700 տարի հետո ծնկի բերել մեր դարավոր թշնամուն։ Այսօր դպրոցը անվանակոչելով Սամվել Հովսեփյանի անունով, երեխաներն ավելի զգաստ կլինեն, ավելի պարտավորված կլինեն, հայրենասիրությամբ կլցվեն»։
Նա պատմեց Սամվել Հովսեփյանի սխրագործություններից, թե ինչպես է կարողացել բանակցություններ վարել հակառակորդի հետ, որի արդյունքում նրանք հանձնվել են․ «Մոտ հարյուր գերի վերցրեցինք, նրանց մեջ մի հատ գող էլ կար»։
Կարդացեք նաև
Որոշումն ընդունվելուց հետո Սասուն Միքայելյանը կրկին մոտեցավ բարձրախոսին, ինչպես ինքն ասաց՝ մի երկու բան ասելու։ Ավագանու անդամ Անի Խաչատրյանը դիմելով Միքայելյանին՝ ասաց՝ մեր միկրոֆոնները մի քիչ խախուտ են, բերանին մի քիչ մոտ պահեք, որ լսենք։
«Բերանին մոտ ես բան չեմ պահում», – արձագանքեց Միքայելյանը։ Նրա պատասխանը բավականին զվարճացրեց ավագանու անդամներին։ «Մեղքը չի՞ ձեր միկրոֆոնները։ Ես էլ բերանից պինդ եմ»,- շարունակեց Միքայելյանը։
Նելլի ԲԱԲԱՅԱՆ
