Դիլիջան համայնքի մարտի 14-ին կայացած ավագանու նիստի սկզբում` Դիլիջան համայնքի ղեկավար Դավիթ Սարգսյանը հայտարարել է, որ քաղաքի Հակոբջանյան փողոցի կենտրոնական հատվածն անվանակոչվել է Խ․ Վաթինյանի անվամբ։
Aravot.am-ը հետաքրքրվեց որն է եղել անվանակոչման պատճառը: Դիլիջանի համայնքապետարանից Aravot.am-ին տեղեկացրեցին, որ անվանակոչման գործընթացը սկսվել է դեռևս 2000 թվականի մարտի 28-ի Դիլիջան համայնքի ավագանու որոշմամբ: Խորեն Վաթինյանը եղել է դիլիջանցի անվանի ճարտարապետ: Այս տարի լրանում է նրա ծննդյան 100-ամյակը: 1961-1975 թվականներին նա եղել է Դիլիջանի քաղկոմի առաջին քարտուղարը, որի ընթացքում էլ Դիլիջանում նախագծել է բազմաթիվ շինություններ և հուշարձաններ. Խորհրդային Հայաստանի 50-ամյակին նվիրված հուշարձան (հնգաթև), Դիլիջանի մշակույթի պալատ, քաղաքապետարանի շենք, Երկրորդ համաշխարհային պատերազմում զոհված զինվորների հուշարձան, Դիլիջանի գլխավոր հատակագիծ:
Ճարտարապետական գործունեությանը զուգահեռ՝ եղել է նաև Հայաստանի Գերագույն խորհրդի մի քանի գումարումների պատգամավոր: 1975-1985 թվականներին աշխատել է որպես Հայաստանի պետական շինարարական կոմիտեի նախագահի տեղակալ:
Լիա ճԱՂԱՐՅԱՆ
Կարդացեք նաև
Լուսանկարը` Դիլիջանի համայնքապետարանի
