Երեկ Ստրասբուրգում՝ Երևանի ժամանակով կեսգիշերն անց Եվրոպական խորհրդարանի լիագումար նիստի ընթացքում ընդունվեց ԵՄ-Ադրբեջան հարաբերությունների վերաբերյալ բանաձև։
Բանաձևի ընդունմանը նախորդեցին Եվրոպական խորհրդարանի պատգամավորների ելույթները, որոնցում որոշները քննադատություններ էին հնչեցնում Ադրբեջանի հասցեին, բայց միևնույն ժամանակ շեշտվում էր նաև, որ Ադրբեջանը ԵՄ-ի էներգետիկ գործընկերն է։
Բանաձևում մի շարք դրույթների ներքո ներառված է նաև Ադրբեջանի նկատմամբ պատժամիջոցների կիրառման հարցը։ Մասնավորապես ամրագրված է․ «Եվրոպական խորհրդարանը կոչ է անում Խորհրդին ուսումնասիրել ԵՄ-ի Մարդու իրավունքների գլոբալ պատժամիջոցների ռեժիմի շրջանակներում թիրախավորված անհատական պատժամիջոցները Ադրբեջանի պաշտոնյաների դեմ, որոնք թույլ են տվել մարդու իրավունքների կոպիտ խախտումներ։ Այդպիսիք են իրավապահների, հատկապես՝ հաշվի առնելով քաղաքական ակտիվիստների, մարդու իրավունքների պաշտպանների և լրագրողների նկատմամբ ոստիկանության համատարած բռնությունները»։
Մեկ այլ դրույթով Եվրոպական խորհրդարանը դատապարտում է Ադրբեջանի կողմից Արևմուտքին թիրախավորելը։ Բանաձևում նշված է․ «Եվրոպական խորհրդարանը դատապարտում է Ադրբեջանից ստացվող ապատեղեկատվությունը՝ Արևմուտքին թիրախավորող, մասնավորապես՝ որպես հետևանք Ուկրաինայի դեմ Ռուսաստանի ագրեսիվ պատերազմի»։
Կարդացեք նաև
Եվրոպական խորհրդարանն իր մտահոգությունն է հայտնում նաև Ադրբեջանում ազգային փոքրամասնությունների իրավունքների պաշտպանության առումով և բանաձևում նշում․ «Եվրախորհրդարանը խորապես ափսոսում է Ադրբեջանի կողմից վավերացված Ազգային փոքրամասնությունների պաշտպանության մասին շրջանակային կոնվենցիան ամբողջությամբ չկատարելու համար, ինչը խախտում է Ադրբեջանի հանձնառությունը՝ պաշտպանել էթնիկ փոքրամասնությունների՝ լեզգիների, թալիշների, հայերի և քրդերի իրավունքները»։
Ադրբեջանի իշխող վերնախավի վարած քաղաքականությունը ևս Եվրոպական խորհրդարանի ուշադրության կենտրոնում է։ Բանաձևում այսպիսի ամրագրում կա․ «Եվրոպական խորհրդարանը դատապարտում է Ադրբեջանի իշխող վերնախավի գործունեությունը մի շարք միջազգային կազմակերպություններում, որոնց նպատակն է թուլացնել ռեժիմի դեմ միջազգային քննադատությունը, մասնավորապես մարդու իրավունքների ոլորտում, ինչի մասին են վկայում ԵԽԽՎ որոշ ներկա և նախկին անդամների գործերը, որոնք «կոռուպցիոն գործունեություն էին ծավալել»՝ հօգուտ Ադրբեջանի»։
Տաթև ՀԱՐՈՒԹՅՈՒՆՅԱՆ
