Հայ-ադրբեջանական կարգավորման համատեքստում պետք է հաշվի առնվի երկու երկրների տարածքային ամբողջականությունը: Այս մասին հայտարարել է Գերմանիայի կանցլեր Օլաֆ Շոլցը:
«Մեզ համար կարևոր է, որ Ադրբեջանի և Հայաստանի միջև երկարատև հակամարտությունը խաղաղ լուծում գտնի… Խոսելով խաղաղ կարգավորման մասին՝ նկատի ունեմ, որ պետք է հաշվի առնվի և ապահովվի և՛ Հայաստանի, և՛ Ադրբեջանի տարածքային ամբողջականությունը»,- ասել է Շոլցը Ադրբեջանի նախագահ Իլհամ Ալիևի հետ հանդիպումից հետո:
Նրա խոսքով՝ պետք է ապահովվեն նաև Ադրբեջանի և Հայաստանի քաղաքացիների իրավունքներն ու ազատությունները՝ համաձայն միջազգային իրավունքի: «Գերմանիան պատրաստ է իր աջակցությունը ցուցաբերել»,- ասել է կանցլերը:
Շոլցը նաև հավելել է, որ Բեռլինում անհանգստացած են հայ-ադրբեջանական սահմանին անկայուն իրավիճակով, որտեղ «լարվածության աճի վտանգ» կա:
Կարդացեք նաև
Անդրադառնալով Հայաստանում ԵՄ քաղաքացիական առաքելության տեղակայմանը՝ Շոլցը նշել է, որ Բեռլինը սատարում է դրան և ապահովում է առաքելության ղեկավարությունը:
Գերմանիայի կանցլերը հավելել է, որ իրենք Ադրբեջանի նախագահի հետ համակարծիք են, որ հայ-ադրբեջանական հարաբերությունների կարգավորումը պետք է տեղի ունենա հնարավորինս շուտ:
Պատրաստեց Վիկտորյա ԱՆԴՐԵԱՍՅԱՆԸ
