«Դա հերթական ապացույցն է, որ Ադրբեջանը տարածքային նկրտումներ ունի ՀՀ-ի ինքնիշխան տարածքների հանդեպ։ Եթե շատ անկեղծ, ապա ԼՂ բանակցային գործընթացի փակուղի մտնելը հենց այդ պատճառով է եղել, որովհետեւ ակնհայտ է եղել, որ ագրեսիվ գործողություններից հրաժարվելու մտադրություն Ադրբեջանը չունի ոչ մի պարագայում»,-լրագրողների հետ հանդիպմանն այսօր հայտարարեց վարչապետ Նիկոլ Փաշինյանը՝ անդրադառնալով հարցադրմանն այն մասին, որ Ադրբեջանը բարձրաձայնում է «ՀՀ-ից բռնագաղթած ադրբեջանցիների» վերադարձի հարցը եւ պատրաստվում է պահանջներ ներկայացնել։
Փաշինյանը նշեց․ «Ձեր ասածը ՀՀ տարածքի հանդեպ ապօրինի ոտնձգություն է, որը հակասում է Պրահայի եւ Սոչիի հայտարարություններին ու պայմանավորվածություններին։ Ադրբեջանն ագրեսիայի նոր փուլ է սկսել։ Հադրութից բռնագաղթած ժողովուրդը պարբերաբար ցույցեր է անում կառավարության դիմաց եւ ճիշտ է անում, որովհետեւ եռակողմ հայտարարության կետերից մեկով՝ ներքին տեղահանվածները պետք է վերադառնան ԼՂ եւ հարակից շրջաններ՝ ՄԱԿ-ի հանձնակատարի հովանու ներքո։ Մինչեւ այսօր Հադրութի ժողովրդին որեւէ մեկը չի առաջարկել վերադառնալ, եւ դա կոպիտ խախտում է Ադրբեջանի կողմից։ Մենք շարունակելու ենք այդ հարցը բարձրաձայնել»։
Նույնը, Փաշինյանի խոսքով, վերաբերում է նաեւ Շուշիից բռնագաղթած հայությանը․ «Հիմա հայաթափված Նախիջեւանի ներկայացուցիչները եւս հարցեր են տալիս ՀՀ կառավարության առաջ եւ ասում են, որ կառավարությունը խոչընդոտում է իրենց իրավունքների պաշտպանությանը։ Նախիջեւանում հայկական մշակութային ժառանգությունը բացահայտ ոչնչացվել է։ Նախիջեւանը հայաթափվել է դեռ 19-րդ դարից սկսած։ Բաքվի, Սումգայիթի, Գանձակի հայությունը տեղահանվել է։ Շահումյանի շրջանի, Գետաշենի հայությունը եւս։ Կառավարությունը երբեք չի խոչընդոտել։ Գուցե չի էլ քաջալերել։ Երեւի դա սխալ է եղել, բայց մենք չենք էլ խոչընդոտել, որ իրենք հետապնդեն իրենց իրավունքները։ Իսկ ՀՀ-ից բռնի տեղահանման դեպքեր չեն եղել։ Մեր արխիվներում կան թղթեր, որ սովետական ՀՀ-ի կառավարությունն աստղաբաշխական թվերով փոխհատուցումներ է վճարել ադրբեջանցիներին։ Նրանք իրենց կամքով են որոշել գնալ։ Կոտորածներ չեն եղել ՀՀ-ում ադրբեջանցիների, մինչդեռ Բաքվում, Սումգայիթում, Հադրութում, Շուշիում եղել են»։
Փաշինյանի խոսքով՝ վերջերս մի գյուղ է գնացել, որի բոլոր հայ բնակիչները ժամանակին բռնի տեղահանվել են Ադրբեջանից․ «Ինչ հասցրել են, հետները բերել են»։
Կարդացեք նաև
Փաշինյանը հստակ չպատասխանեց հարցին՝ միջազգային իրավական ատյաններում ՀՀ-ն հակընդդեմ հայց ներկայացնելո՞ւ է հայ փախստականների հարցով, սակայն նշեց, որ Նախիջեւանի հայ համայնքը, Շահումյանի, Հադրութի, Բաքվի, Սումգայիթի, Շուշիի հայերը, որոնք հազարամյակներով ապրել են ներկայիս Ադրբեջանի տարածքում, իրենց իրավունքները պաշտպանելու հիմքեր ունեն։
Լուիզա ՍՈՒՔԻԱՍՅԱՆ
