«Տեւական ժամանակ է՝ ՀՀ-ում ՄԻՊ չկա։ Ի՞նչ եք մտածում, այս բացն ինչպե՞ս է լրացվելու»,-ԱԺ պետաիրավական հարցերի հանձնաժողովի նիստում այսօր «ՀՀ կառավարության ծրագրի 2022թ․-ի կատարման ընթացքի եւ արդյունքների մասին» զեկույցը ներկայացնելու ժամանակ ՀՀ արդարադատության նախարար Գրիգոր Մինասյանին հարցրեց «Հայաստան» խմբակցության պատգամավոր Գեղամ Նազարյանը։
Գրիգոր Մինասյանը պատասխանեց․ «Ես չեմ ճիշտ պաշտոնյան, որպեսզի հարցին պատասխանեմ, բայց միաժամանակ՝ լավ չէ, որ դեռեւս որոշում չկա, բայց մյուս կողմից լավ է, որ այսքան մեծ ուշադրությամբ եւ ֆիլտրներով է իրականացվում թեկնածուի փնտրտուքը։ Լավ է, որ քաղաքական թիմը խոշորացույցի տակ է քննում թեկնածուներին։ Ժամանակին երեւի հեշտ էին այդ որոշումները կայացվում, որովհետեւ ընտրությունը ժողովրդավարական չէր»։
Գեղամ Նազարյանը նաեւ հայտարարեց․ «Եթե մի երկրում արդարադատությունը կաղում է, ապա մյուս բոլոր ոլորտներում եւս խնդիրներ են լինելու։ Մեկ օրինակով ասեմ։ ԵՊՀ մուտքի մոտ՝ դռների արանքում, կարմիր բերետավորները փորձում էին ամենակոպիտ ձեւով ասֆալտին պառկեցնելով՝ ձերբակալել ուսանող Տարոն Մանուկյանին։
Արմենակ Նազարյանը փորձում էր թույլ չտալ այդ անմարդկային ձերբակալումը, որի պատճառով դաժան ծեծի ենթարկելով՝ նրան տարան ոստիկանական մեքենան, որում շարունակեցին հարվածել։ Ամիսներ անց Արմենակին են ներկայացնում մարդկանց, որոնք կապ չեն ունեցել այդ գործի հետ, բայց ասում են, թե նման բան չի եղել։ Արմենակը, բնականաբար, չի ճանաչում այդ մարդկանց, ու գործը կարճում են։ Սա իմ՝ պատգամավորիս որդուն էր վերաբերում, բա պատկերացնո՞ւմ եք հասարակ ժողովրդի վիճակը»։
Կարդացեք նաև
Լուիզա ՍՈՒՔԻԱՍՅԱՆ
