ՀՀ առողջապահության նախկին նախարար, այժմ ՔՊ խմբակցության պատգամավոր Արսեն Թորոսյանն օրերս բողոքի նոտաներ էր հղել՝ կապված Հակակոռուպցիոն կոմիտեի կողմից կովիդի համավարակի աշխատանքների շուրջ հարուցված քրեական վարույթի շրջանակներում իրականացված գործողությունների հետ։ Խորհրդարանում այսօր ՊԵԿ նախագահ Ռուստամ Բադասյանին լրագրողներն ասացին, որ իր ներկայիս տեղակալ Արտյոմ Սմբատյանը նախկինում առողջապահության փոխնախարար էր, նա հարցաքննվե՞լ է։
Ռուստամ Բադասյանը պատասխանեց․ «Եթե չեմ սխալվում, տեւական ժամանակ առաջ եղել է հարցաքննություն։ Եվ ոչ միայն իր։ Գիտեմ, որ այդ գործով բազմաթիվ պաշտոնյաներ են հարցաքննվել։ Ինքն էլ դրա շրջանակում վկայի կարգավիճակով հարցաքննվել է»։
Հարցին՝ ձեր տեղակալի համար անհանգստացա՞ծ եք, Ռուստամ Բադասյանը պատասխանեց․ «Բացարձակ։ Ոչ ինքը, ոչ ես անհանգստացած չենք»։
Կարդացեք նաև
Ապա Ռուստամ Բադասյանը չցանկացավ մեկնաբանել մամուլում առկա տեղեկությունները, որ իր նախկին տեղակալ Շուշանիկ Ներսիսյանը կոռուպցիոն պատմությունների մեջ է եղել եւ այդ գումարներով ԱՄՆ-ում իր համար տուն է գնել։
Ինչ վերաբերում է ՊԵԿ հաշվեկշռում գտնվող ՊՆ նախկին շենքի բնակիչներին, որոնք հիմա վրաններում են գիշերում, Ռուստամ Բադասյանը նշեց․ «Պետական գույքն օգտագործման կանոններ ունի։ Չի կարելի ցանկացած ձեւով այն օգտագործել։ Բացի այդ, վթարային շենքերի մասին է խոսքը եւ կյանքի, առողջության վտանգի խնդիր կա։ Եվ որքանով տեղյակ եմ, առնվազն որոշ անձանց պատկան մարմինները կացարանով են ապահովել»։
Լուիզա ՍՈՒՔԻԱՍՅԱՆ
