Շիրակի մարզի փաստաբանները պատրաստվում են գործադուլ անել, եթե խնդրին լուծում չտրվի, պատկան մարմինները պետք է հասկանան, որ Շիրակի մարզում իրավիճակը ծայրահեղ խնդրահարույց է։ Այս մասին այսօր Փաստաբանների պալատում մարզի փաստաբանների տված ասուլիսի ընթացքում հայտարարեց փաստաբան Արամայիս Հայրապետյանը:
Ասուլիսին ներկա փաստաբանների հայտարարությամբ, Շիրակի մարզի քրեական, քաղաքացիական, վարչական դատարանների դատավորները պարբերաբար փոխվում են՝ ինքնահոսի թողնելով դատական գործերը: Նրանք պնդում են, որ դատավորների հաճախակի փոփոխությունների պատճառով Շիրակի մարզի դատարանները պարալիզացվում են, արդյունքում՝ դատարանների վերջին մեկ տարվա աշխատանքը գրեթե 70% անարդյունավետ է եղել: Ստեղծված իրավիճակում տուժում են քաղաքացիները, նսեմացվում է նրանց վերաբերմունքը արդարադատության նկատմամբ, չեն գործում իրավական պաշտպանություն ապահովելու մեխանիզմները։
«Այսինքն, քաղաքացիները, որոնց գործերը գտնվում են դատաքննության փուլում, կլինի՝ քրեական, քաղաքացիական, թե վարչական, տարիներ շարունակ չեն կարողանում հասնել իրենց գործով որևէ ելքի։ Ստացվում է, որ որևէ դատավոր գործն ընդունում է իր վարույթում, սկսում է գործի քննությունը, հասնում է որոշակի փուլի, տեղափոխվում է այլ դատարան և նոր եկած դատավորը ստիպված է լինում գործը սկսել զրոյից։ Այդ գործերն այնքան են կուտակվել, որ հաստիքների նույնիսկ համալրման դեպքում Շիրակի մարզում գործերի քննության ողջամիտ ժամկետ հնարավոր չէ պահպանել։
Վերջին երկու-երեք տարում Շիրակի մարզում 13-14 դատավորների տեղափոխություն է եղել, այսինքն՝ ողջ կազմի: Ավելին, Շիրակի մարզում ամենաերկար մնացած դատավորը մնացել է մոտ մեկ տարի։ 1-1.5 տարի աշխատում են, անգամ՝ մի քանի ամիս աշխատում են, հետո տեղափոխվում Երևան կամ այլ մարզեր, որի արդյունքում նրա վարույթում գտնվող քրեական գործերը գումարվում են նոր գործերին, տրվում է այլ դատավորի, ստացվում է, որ ամիսներ շարունակ քրեական գործը քննում են, ռեսուրսներ վատնում, բայց գործը որևէ լուծում չի ստանում»,- նշեց փաստաբան Արամայիս Հայրապետյանը։
Կարդացեք նաև
Նրա խոսքով, դատավորների պարբերաբար տեղափոխության պատճառով զանգվածաբար խախտվում են քաղաքացիների իրավունքները, քաղաքացիները տարիներ շարունակ չեն իմանում՝ իրենց գործով ելքն ինչպես է լինում։
Արամայիս Հայրապետյանը բերեց իր պաշտպանյալներից մեկի օրինակը, երբ ՄԻԵԴ-ը Շիրակի մարզի դատարանի վարույթում գտնվող գործով ընդդեմ ՀՀ-ի որոշում է կայացրել՝ ժամկետների խախտման համար՝ պարտավորեցրել փոխհատուցում տրամադրել, բայց գործը կրկին նորից է պետք է սկսվի, քանի որ դարձյալ դատավոր է փոխվել։
Փաստաբանները տեղեկացրեցին, որ ամիսներ շարունակ ԲԴԽ-ից հանդիպում են պահանջում՝ նույնիսկ Փաստաբանների պալատն է դիմել ԲԴԽ-ին, սակայն արձագանք չկա։
Լուսինե ՄԱՐԳԱՐՅԱՆ
