Բնակչության աճ ապահովելու արդյունավետության տեսանկյունից ջանքերը պետք է միաժամանակ երեք ուղղություններով ուղղվեն՝ ծնելիության աճ, արտագաղթի նվազեցում, ներգաղթի ավելացում: Համենայնդեպս, խնդրի լուծումն այսպես է տեսնում «Ապագա հայկականը» առաջին համահայկական քաղաքացիական համաժողովի երրորդ օրվա քննարկումների եւ քվեարկության մասնակիցներից 84 մարդ: Իսկ քննարկվող թեման էր բնակչության աճը :
Եռօրյա համաժողովի աշխատանքներն այսօր ամփոփվեցին:
Քվեարկության մասնակիցներից 83-ը ճիշտ են համարում խնդրի լուծման համար առաջին հերթին Հայաստանից արտագաղթածների ներգաղթի ապահովումը: Խնդրի լուծումն ավանդական սփյուռքից ներգաղթի ապահովմամբ տեսնում է 30 մասնակից: Բնակչության աճի խնդիրը նաեւ օտարազգիների ներգաղթով լուծելու տարբերակ տեսնում է 39 հոգի:
Քվեարկության 112 մասնակից էլ կողմ է, որ ժողովրդագրական քաղաքականությունը Հայաստանում իրականացվող քաղաքականության գլխավոր ուղղություն հռչակվի, որին պետք է սպասարկեն մյուս ոլորտների քաղաքականությունները:
Կարդացեք նաև
88 հոգի էլ կարծում են, որ առանց տնտեսական խնդիրները լուծելու ներգաղթի ապահովումը դեպի Հայաստան հանգեցնելու է սոցիալական լարվածության:
Եռօրյա համաժողովի աշխատանքների արդյունքում նաեւ համալրվեց նախաձեռնության խորհրդի կազմը: Խորհրդի նորընտիր երեք անդամներն են՝ Ֆլորա Վիգերս՝ ԱՄՆ, Մարինա Պետրոսյան՝ Ֆրանսիա եւ Արի Կեորկ Դեմիրճօղլու՝ Թուրքիա:
Նելլի ԳՐԻԳՈՐՅԱՆ
