Գյումրու «Թումո» ստեղծարար տեխնոլոգիաների կենտրոնում այսօր «Պետություն-մասնավոր․ փոխհամագործակցություն» խորագիրը կրող բիզնես ֆորումի ժամանակ լրագրողների ուշադրությունը գրավեց Գյումրու քաղաքային իշխանության կազմի նոր համալրումը։
Գյումրու քաղաքապետ Վարդգես Սամսոնյանի ու փոխքաղաքապետ Արթուր Պապիկյանի կողքին նստել էր Գյումրու ավագանու ՔՊ-ական նորաթուխ անդամ Վահագն Մկրտչյանը՝ վարչապետի տիկնոջ՝ Աննա Հակոբյանի հարազատ մորաքրոջ թոռը, որը թեև Գյումրիում ընդհանրապես ճանաչում չունի, Բժշկական համալսարանը նոր ավարտած 28 տարեկան երիտասարդ է, որպես ավագանու անդամ էլ գեթ մեկ հարց բարձրաձայնած չկա՝ ի օգուտ իր քաղաքի, այդուհանդերձ ՔՊ-ն պատրաստվում է նրան փոխքաղաքապետ կարգել։
Ըստ քաղաքապետարանի մեր աղբյուրների, նա արդեն գնում է քաղաքապետարան աշխատանքի, մի քանի իրադարձության արդեն մասնակցել է՝ որպես փոխքաղաքապետ։
Կարդացեք նաև
«Դեռ չնշանակված՝ իրեն փոխքաղաքապետ է զգում»,-նկատեցին լրագրողները։
Առաջիկա ավագանու նիստում, ամենայն հավանականությամբ, ամսի 15-ին քվեարկության կդրվի նաև նրա ընտրության հարցը։
Հիշեցնենք, որ ՏԻՄ օրենքի 57 հոդվածի, 3-րդ մասը սահմանում է․ «Համայնքի ղեկավարի տեղակալներին համայնքի ղեկավարի ներկայացմամբ նշանակում է ավագանին` ընդհանուր թվի ձայների մեծամասնությամբ: Համայնքի ղեկավարի տեղակալի թեկնածությունը ավագանու կողմից երկու անգամ չհաստատվելու դեպքում վերջինս նշանակվում է համայնքի ղեկավարի կողմից»:
Նունե ԱՐԵՎՇԱՏՅԱՆ
