«Ապագա հայկականը» համաժողովի ընթացքում հնարավորություն կա Հայաստանի և սփյուռքի տարբեր շերտերի հետ քննարկել և հասկանալ իրենց մոտեցումները, պատկերացումները, որի արդյունքում կարող են ձևավորվել առաջնահերթությունները: Այս մասին այսօր լրագրողների հետ զրույցում ասաց «Ապագա հայկականը» համահայկական առաջին համաժողովի փորձագետ «Վերադարձ Հայաստան» կազմակերպության ղեկավար Վարդան Մարաշլյանը:
Նա հույս հայտնեց, որ առաջնահերթությունների ձևավորումից հետո գործնական քայլեր կարվեն՝ համախմբելու Հայաստանի և սփյուռքի հայերին կոնկրետ նպատակի հասնելու համար:
«Սա այլ համաժողովներից տարբերվում է, քանի որ դասական Հայաստան-սփյուռք համաժողով չէ և հարցերի զգալի մասը վերաբերվում է Հայաստանին և հայաստանցիներին: Այս համաժողովի ձևաչափն է նոր և հետաքրքիր, որտեղ հասարակության տարբեր շերտերի ներկայացուցիչները մասնակցում են քննարկմանը»,-ասաց նա:
Կարդացեք նաև
«Սփյուռք-պետություն հարցերում վստահության խնդիր կա, ինչպե՞ս կարելի է սփյուռքի հետ անվստահության մթնոլորտը փոխել, ինստիտուցիոնալ առումով գործնական կոնկրետ առաջարկներ կան: Հայաստանն էլ պետք է հոգ տանի սփյուռքի տարբեր համայնքների մասին, հասկանա սփյուռքը ինչ խնդիրներ ունի: Աշխատանքները պետք է այնպես կազմակերպել, որպեսզի սփյուռքը դրա հավասար մասնակիցը լինի, այսինքն ապաքաղաքականացվի, համապատասխան կառույցներ ստեղծվի, որտեղ և՛ սփյուռքն է ներկայացված, և՛ Հայաստանը»,-ասաց նա:
Նա համոզված է, որ կան հայրենադարձության կազմակերպման արդյունավետ մոդելներ, որոնք պետք է պարզապես կիրառել:
Ի պատասխան Aravot.am-ի այն հարցի, թե հարյուրամյակից ավելի հայ եկեղեցու ու կուսակցությունների շուրջ է համախմբվել սփյուռքը, արդյո՞ք քաղաքացիական այս նախաձեռնությունն ավելին կարող է անել, քան այդ կառույցները՝ Վարդան Մարաշլյանը պատասխանեց. «Տարբեր հաշվարկներով սփյուռքում 7 մլն հայ է ապրում, գործում են 30 հազարից ավել կազմակերպություններ, բայց այդ կազմակերպությունների շնորհիվ մենք կարողանում ենք կանսոլիդացնել սփյուռքի ընդամենը 20-25 տոկոսը: Սա նշանակում է, որ սփյուռքի զգալի մասը որևէ կառույցի միջոցով չի մասնակցում, մենք պետք է ձև գտնենք այդ մարդկանց ևս ներգրավելու: Դասական հին մեխանիզմներն արդեն չեն աշխատում, չի նշանակում, իհարկե, որ մենք պետք է լիովին հրաժարվենք այդ մեխանիզմներից, բնավ՝ ոչ Պետք է ձևավորենք այնպիսի մեխանիզմներ, որտեղ յուրաքանչյուր մարդ կարողանա իրեն գտնել: Գտնելը պետք է լինի շատ կիրառական և կոնկրետ, ոչ թե երազների ու ընդհանուր գաղափարների շուրջ»,-եզրափակեց Մարաշլյանը:
Մանրամասները՝ տեսանյութում
Լուսինե ՄԱՐԳԱՐՅԱՆ
