«ՊՆ-ի շները, կներեք էդպես ասում, որ այսօր այստեղ վերընկած են, 12 ամիս ոչինչ չեն արել, որ պարզեն իմ երեխայի ճակատագիրը, իմ երեխան անհետ կորած էր. վերջում մեր ծնողական համայնքի ջանքերով ռուս խաղաղապահների միջոցով 2021-ի նոյեմբերին Ադրբեջանը նոր հանձնեց մեր երեխաների մասունքները։ Նստած խոսում են երաշխիքների մասին, ես ասացի՝ առաջին երաշխիքն այն պետք է լինի, որ չտանեք մեր երեխեքին մորթեք: Եթե այդ երաշխիքը կապահովեք, հետո եթե կլինեն դեպքեր, որոնք ձեր վերահսկողությունից դուրս են, հասկանալի է, պատերազմող երկիր ենք, այդ դեպքում էլ պետք է ունենանք առաջնահերթություններ»,- այսօր այս մասին Ազգային ժողովում լրագրողների հետ զրույցում ասաց 44-օրյա պատերազմում զոհված զինծառայող Հայկ Մելիքյանի մայրը՝ Նաիրա Մելիքյանը:
Նշենք, որ Ազգային ժողովում 44-օրյա պատերազմում զոհվածների մայրերի մասնակցությամբ փակ կարգով քննարկվում էր պատերազմում զոհվածների ընտանիքներին սոցիալական երաշխիքներ տրամադրելու մասին նոր օրենքի նախագիծը։
Հայկ Մելիքյանի մայրը հայտնեց, որ իրավասու պաշտոնատար անձանց փոխանցմամբ «հների պատճառով նոր դեռ 2004 թվականի ընտանիքներին են հասել բնակարանային ապահովման մասով» , այսինքն, պնդում է Նաիրա Մելիքյանը, մինչև հասնեն 2020 թվականին, կարող է մեր ընտանիքների մեծ մասը քաղցից կամ այլ խնդիրներից չլինեն։
«Սա դատարկաբանություն էր, ինչպես իրենց արած յուրաքանչյուր այլ բան։ Ես կոնկրետ օրենքի նախագծի դեմ որևէ բան չունեմ, բայց ինձ ֆիզիկապես տհաճ էր մույն սենյակում գտնվել էդ մարդկանց հետ, որոնք մեր երեխաներին տարել ու մորթել են, մարմինները չեն հավաքել, փոշիացրել են, իսկ այսօր եկել ու խոսում են երաշխիքների մասին։ Այ ողորմելիներ, ձեր երաշխիքները պահեք ձեզ։ Մենք շատ կուզեինք էս իրավիճակում չհայտնվեինք ու էդ երաշխիքները նվիրեինք ձեզ»,- ամփոփեց Նաիրա Մելիքյանը։
Կարդացեք նաև
Նելլի ԳՐԻԳՈՐՅԱՆ
