ՀՀ պաշտպանության փոխնախարար Արման Սարգսյանն այսօր խորհրդարանում հրաժարվեց պատասխանել լրագրողների հարցերին: Հարցերը վերաբերում էին օրերս Արցախի նկատմամբ տեղի ունեցած ադրբեջանական դիվերսիային, երեկ՝ ՀՀ-ում Սոթքի հատվածում հնչած կրակոցներին: Այս եւ մնացյալ հարցերին փոխնախարարի պատասխանը մեկն էր՝ ՊՆ-ն ունի լրատվական ծառայություն, որը անմիջապես տեղեկատվություն տարածում է:
Արցախի հետ կապված հնարավո՞ր է էսկալացիա՝ հարցը մնաց անպատասխան:
«Լրացուցիչ հարցերին չեմ ցանկանում պատասխանել»,- ասաց փոխնախարարը:
Խոսելով զոհվածների ծնողների հետ փակ հանդիպումից, որին մասնակցում էր նաեւ փոխնախարարը եւ պատասխանելով հարցին, որ ծնողները դժգոհ են մնացել հանդիպումից, Արման Սարգսյանն ասաց, որ դժգոհությունը եղել է ոչ թե իր աշխատանքից, այլ նրանից, որ քննարկվող նախագիծը աշխատանքային կարգով քննարկումների համար դուրս է եկել շրջանառությունից, բայց վստահեցրեց, որ աշխատանքային քննարկումներից հետո, նախագիծը իր տրամաբանական հանգրվանին կհասնի: Քննարկվող նախագիծը վերաբերում է զոհվածների ընտանիքներին սոցիալական երաշխիքներ տալու հարցին: Փոխնախարարը պատասխանեց, որ շատ հարցեր այլ նախագծերով արդեն կարգավորված են, որոշներն այս նախագծով չպետք է կարգավորվեն. այժմ այդ իրավական կարգավորումներն են ընթանում:
Կարդացեք նաև
«Պաշտպանական համակարգը ամրանում է եւ ամեն ինչ արվում է, որպեսզի մենք ունենանք ավելի պաշտպանված պետություն եւ մարտունակ բանակ»,- հայտարարեց Արման Սարգսյանը՝ վստահեցնելով, որ ինչ անհրաժեշտ է արվում է ու չմանրամասնելով, թե ի՞նչ է անհրաժեշտ կամ ի՞նչ է արվում:
Նելլի ԳՐԻԳՈՐՅԱՆ
