«Ազատություն». Ռուսաստանի գլխավոր դատախազությունն «անցանկալի» կազմակերպություն է ճանաչել Transparency International կառույցը, որը հրապարակել է Դաշնությունում բարձրաստիճան պաշտոնյաների շրջանում տարածված կոռուպցիայի հարյուրավոր դեպքերի մասին հաղորդագրություններ և վերլուծություններ:
Գլխավոր դատախազությունը հրապարակել է եզրակացություն, ըստ որի՝ «Transparency International կազմակերպությունը սպառնալիք է Ռուսաստանի սահմանադրական կարգի համար, քանի որ ի պաշտոնե հանդես գալով իբրև կոռուպցիայի դեմ պայքարող կառույց՝ միջամտում է երկրի ներքին գործերին»:
Մոսկվան վաղուց է բացահայտ թշնամական կեցվածք որդեգրել այդ կազմակերպության նկատմամբ: Դեռ 2015 թվականին կազմակերպության ռուսաստանյան ներկայացուցչությունը ճանաչվել է «օտարերկրյա գործակալ»:
Ռուսաստանում մոտ յոթ տասնյակ կազմակերպություններ «անցանկալի» են ճանաչվել: Դրանց թվում են “Проект” և “Важные истории” կայքերը, «Կազմակերպված հանցավորության և կոռուպցիայի լուսաբանման նախագիծ» կենտրոնը (OCCRP), որը միավորում է հետաքննող լրագրողներին, գերմանացի աշխարհահռչակ գրող Հայնրիխ Բյոլի հիմնադրամը, խորհրդային այլախող, աշխարհահռչակ ֆիզիկոս և Խաղաղության Նոբելյան մրցանակի դափնեկիր Անդրեյ Սախարովի հիմնադրամը, այլ կառույցներ:
Կարդացեք նաև
Ըստ Transparency International-ի հրապարակած Կոռուպցիայի ընկալման 2022 թվականի համաթվի՝ Ռուսաստանը 180 երկրների ցանկում զբաղեցնում է 137-րդ տեղը:
Արմեն ՔՈԼՈՅԱՆ
Նյութն ամբողջությամբ՝ սկզբնաղբյուր կայքում
