«Այն իրավիճակը, որում այսօր հայտնվել է Արցախը, անսպասելի չէր։ Երեկ կատարվածը ոչ թե դիվերսիոն հարձակում էր, այլ ահաբեկչություն, որի ակունքները խորն են։ Պատերազմից հետո Ադրբեջանը բազմիցս ասել է, որ Արցախն իր համար միայն տարածք է․ այս ամենը կատարվում է արցախահայությանը բնաջնջելու եւ Արցախի հարցը փակելու համար։ Այդ հարձակումն այդ քայլերից մեկն է, որին նախորդել է Լաչինի միջանցքի փակումը։ Նման իրավիճակով ուզում են անհնարին դարձնել արցախահայության բնակությունն Արցախում»,-Aravot.am-ի հետ զրույցում այսօր ասաց ԱԺ «Հայաստան» խմբակցության պատգամավոր Գառնիկ Դանիելյանը։
Հիշեցնենք, որ արցախաադրբեջանական շփման գծում մարտի 5-ին Ադրբեջանի հարձակողական եւ դիվերսիոն գործողությունների հետեւանքով զոհվել են ԱՀ ոստիկանության 3 եւ վիրավորվել՝ 1 աշխատակից։
Գառնիկ Դանիելյանի համար ամենամեծ մտահոգությունն այն է, որ ՀՀ իշխանությունը հերթական նման իրավիճակում չունի հստակ գնահատականներ եւ միջազգային հարթակները չի օգտագործում՝ հարցը բարձրաձայնելու համար․ «Արտերկրում բազմաթիվ հանդիպումներ են ունենում, բայց Ադրբեջանի վայրագություններին պատշաճ գնահատականներ չեն տրվում։ Ադրբեջանի ցեղասպան քաղաքականությանը համարժեք գնահատական պետք է տան առաջնահերթ ՀՀ իշխանությունները։ Միջազգային հանրությունը մեր արձագանքից է, որ հետեւություն պետք է անի։ Այլապես կարձանագրի, որ խնդիր չկա։ Կոշտ արձագանքներ են պետք նման դեպքերին, որպեսզի միջազգային հանրությունը հասկանա՝ Ադրբեջանի նպատակն արցախահայությանը բնաջնջելն է»։
Պաշտոնական Բաքուն երեկ կատարվածն առաջ մղելով՝ հերթական պնդումն արեց, թե Լաչինի միջանցքում պետք է անցակետեր տեղակայվեն։ Գառնիկ Դանիելյանը նախ շեշտեց՝ Ադրբեջանի վարկածը, թե զենք է տեղափոխվել ոստիկանական մեքենայով, կեղծիք է․ «Արցախի ոստիկանությունն իր գործառույթներն իրականացնելիս ենթարկվել է ահաբեկչության։ Եվ եթե Ադրբեջանն ուզում է անցակետ տեղադրել եւ ելք-մուտք ստուգել, ապա դրա կատարումը կլինի ամենամեծ ձախողումը։ Այդպես Ադրբեջանը նախ իր համար «անցանկալի» մարդկանց կձերբակալի, իսկ հետո արցախահայությանը կահաբեկի։ Սա մեր համար կռվան պետք է լինի՝ ցույց տալու Ադրբեջանի ցեղասպան քաղաքականությունը։ Ամենամեծ լծակներն այս հարցում ՀՀ իշխանության ձեռքին են՝ թիրախային գնահատականներ տալու համար։ Ադրբեջանն իրականացնում եւ կրկին նախապատրաստում է էթնիկ զտումներ ու գնալով ավելի սանձարձակ է դառնում։ Դա նաեւ այս իշխանության պատասխանատվության գոտում է, որովհետեւ Ադրբեջանի արարքները համարժեք գնահատականի եւ արձագանքի չեն արժանանում։ Եվ թիրախում միայն Արցախը չէ։ ՀՀ-ում չկա տարածք, որի հանդեպ Ադրբեջանը հավակնություն չունի»։
Կարդացեք նաև
Զրույցն ամբողջությամբ՝ տեսանյութում։
Լուիզա ՍՈՒՔԻԱՍՅԱՆ
